Ótken jyly 849 balabaqsha paıdalanýǵa berildi - Memlekettik hatshy

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Astanadaǵy jańa úlgidegi balabaqshasynyń ashylý rásimine qatysty, dep habarlaıdy QazAqparat tilshisi.

Memlekettik hatshy tsıfrlyq dáýirdiń barlyq zamanaýı talabyna saı elordalyq balabaqshanyń respýblıkadaǵy balabaqshalar úshin úlgi bolatynyn atap ótti jáne Qazaqstan balalaryn mektepke deıingi bilimmen qamtý máselesine erekshe toqtaldy.

 «Respýblıka boıynsha ótken jyly 849 jańa mektepke deıingi mekeme paıdalanýǵa berildi. Astanada 80-nen astam balabaqshalar men túrli ortalyqtar ashyldy. Biraq, qajettilik áli de bar.  Qazir elimizdegi 3-6 jas aralyǵyndaǵy balalardyń 90%-in mektepke deıingi bilimmen qamtyp otyrmyz. Alda 2020 jylǵa deıin balalardyń 100%-in balabaqshamen qamtamasyz etý mindeti tur. Sol baǵytta jumysty jalǵastyrmaqpyz», - dedi G. Ábdiqalyqova jańa balabaqshanyń ashylý saltanatynda.

Gúlshara Ábdiqalyqova eldegi demografııalyq jaǵdaı kórsetkishiniń ulǵaıǵanyn atap ótti. Ótken jyly Qazaqstanda 409 myń sábı dúnıege kelse, bir ǵana Astanada 30 myń bala dúnıe esigin ashqan.

«Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda mektepke deıingi bilim berý isinde balalardyń erte damýyna arnalǵan biryńǵaı standarttardy engizý qajettigi aıtylǵan. Ol úshin barlyq jaǵdaı jasalýy tıis, balalarǵa arnalǵan arnaıy mekemeler qurylýy kerek», - dep óz sózin túıindedi Memlekettik hatshy.
   



 

Aıta keteıik, Astanada QR ortalyq memlekettik organdaryndaǵy memlekettik qyzmetshilerdiń balalaryna arnalǵan jańa úlgidegi balabaqsha ashyldy.