Ótken jyly 8,5 mln qazaqstandyq kınoteatrlarǵa barǵan
NUR-SULTAN. QazAqparat – 2021 jyly elimizde kınofılmder kórsetý salasyndaǵy qyzmet kólemi 8,1 mlrd teńgege jetti. Al bir jyl buryn bul kórsetkish 8 mlrd teńge bolǵan edi, dep habarlaıdy QazAqparat.
Ranking.kz portalynyń derekterine qaraǵanda, koronavırýs indeti taraǵanǵa deıingi 2019 jyly qazaqstandyqtar 23,4 mlrd teńge qarajatyn kıno kórýge jumsaǵan bolatyn. Jalpy elimizde 2021 jyly 104 kınoteatr qyzmet kórsetti. Onyń tórteýi ǵana aýyldyq jerde ornalasqan. Salystyrmaly túrde aıtar bolsaq, 2020 jyly respýblıkada 104 kınoteatr, onyń úsheýi aýyldyq jerde, 2019 jyly 101 kınoteatr, onyń beseýi aýyldyq jerde ornalasqan bolatyn. Kınoteatrlardyń eń kóbi Almaty qalasynda – 22. Odan keıin Nur-Sultan men Qaraǵandy oblysynda 10-nan kınoteatr bar.
Kıno kórsetýmen aınalysatyn uıymdardyń tabysy 1 jyldyń ishinde aıtarlyqtaı artty. Máselen, 2020 jyly 5,9 mlrd teńge tabys tapsa, 2021 jylǵy tabystary 13,6 mlrd teńgege jetti. Degenmen, 2019 jylǵy deńgeıge jete alǵan joq. Sol jyly kıno kórsetetin uıymdar 21,2 mlrd teńge tabys tapqan edi.
Ótken jyly kınoteatrlar tabysynyń negizgi bóligin sheteldik fılmderdi kórsetýden tapty - 10,8 mlrd teńge. Aıta keterligi, 2020 jyly kórsetilýi tıis sheteldik fılmderdiń birazy 2021 jyly ǵana kórermenge jol tartqan bolatyn. Ókinishke oraı ulttyq fılmderdi kórsetýden túsetin tabys 2020 jylǵy 2,1 mlrd teńge bolsa, ótken jyly qysqaryp, 1,5 mlrd teńgeni qurady. Al birlesken óndiris túsirgen fılmderdi kórsetýden túsken tabys 119,9 mln teńgeden 1,3 mlrd teńge deıin artty.
2021 jyly kı n osea n starǵa barýshylar sany 8,5 mln-ǵa jetti. Bir jyldyń ishinde kórsetkish 76,8 paıyzǵa artqanymen 2019 jylmen salystyrǵanda 2,4 esege qysqarǵan.
2021 jyly kın o teatrlarǵa barǵan 8,5 mln adamnyń 6,6 mln-y sheteldik, 961,8 myńy ulttyq, al 885,9 myńy birlesip túsirilgen fılmderdi tamashalaǵan.
2022 jyldyń naýryz aıynyń qorytyndysynda kınoteatr qyzmetiniń baǵasy jyl ishinde 4,8 paıyzǵa qymbattady. Al bir jyl buryn ósim birden 10,8 paıyz bolǵan edi.
Osy jyldyń naýryz aıynda Qazaqstan qalalarynda ornalasqan kınoteatrlardaǵy bılettiń ortasha baǵasy 1 655 teńge boldy. Elimizdiń iri qalalary arasynda kıno bıletiniń eń qymbaty Shymkent (2 714 teńge), Atyraý (2 583 teńge) jáne Túrkistan (2 550) qalalarynda tirkelgen. Al eń arzan baǵa Semeı, Oral jáne Kókshetaý qalalarynda – 1 200 teńgeden.
