Ótken jyly 5 myńnan astam náreste shetinegen - statıstıka
ASTANA. 14 aqpan. QazAqparat - 2012 jylǵy qańtar-jeltoqsanda AHAT organdarynda 379,1 myń jańa týǵan náreste tirkeldi, bul 2011 jylǵy sáıkes kezeńimen salystyrǵanda 1,9%-ǵa kóp. Bul týraly Statıstıka agenttiginiń tóraǵasy Álıhan Smaıylov búgin ótken brıfıngte málimdedi.
Onyń aıtýynsha, elimizde ótken jylǵy qańtar-jeltoqsan aılarynda ólgender sany 141,2 myń adamdy qurady, bul 2011 jylǵy osy kezeńine qaraǵanda 2,4%-ǵa kem.
Atalǵan merzimde respýblıkada 1 jasqa deıingi 5100 náreste ólimi tirkeldi. Bul 2011 jylǵy qańtar-jeltoqsanmen salystyrǵanda 1 jasqa deıingi shetinegen náresteler sanynan 8%-ǵa kem. Agenttik tóraǵasynyń aıtýynsha, náreste óliminiń negizgi sebebi perınataldyq kezeńde paıda bolatyn jaǵdaılar, odan 2012 jylǵy qańtar-jeltoqsanda 2921 náreste ólgen. Týa bitken aýytqýlardan ólgender sany 986, tynys organdary aýrýlarynan - 363 jáne jazataıym jaǵdaıdan, ýlanýdan jáne jaraqattan - 214 náreste baqılyq bolǵan.
Sondaı-aq, esepti merzimde AHAT organdarynda 164,7 myń neke tirkelipti. Olardyń sany 2011 jyldyń sáıkes kezeńimen salystyrǵanda 2,6%-ǵa ósken. Degenmen, osy kezeńde 48,5 myń ajyrasýlar tirkelip, olardyń sany 8%-ǵa óskendigi baıqalyp otyr. 2012j. qańtar-jeltoqsan aılarynda respýblıka boıynsha kóshi-qonnyń teris aıyrymy qalyptasyp, mınýs 1381 adamdy qurady.
