Ótken jyly 4 myńnan astam azamat jaza taǵaıyndaýdaǵy izgilendirý saıasatynyń arqasynda bas bostandyǵynan aıyrylǵan joq - M.Álimbekov
ASTANA. 14 qańtar. QazAqparat /Marlan Jıembaı/ - Ótken jyly 4 myńnan astam azamat jaza taǵaıyndaýdaǵy izgilendirý saıasatynyń arqasynda bas bostandyǵynan aıyrylǵan joq.
Bul týraly búgin QR Joǵarǵy sotynyń aqparattyq-tehnıkalyq ortalyǵynyń ashylýy barysynda BAQ ókilderine suhbat bergen atalǵan vedomstvonyń basshysy Musabek Álimbekov aıtty.
Onyń atap ótýinshe, 2009 jyly qarashada ótken QR Sýdıalarynyń 5 sezinde Memleket basshysy jaza taǵaıyndaýdy izgilendirý saıasatyn júzege asyrýdy tapsyrǵan bolatyn. Onda azamattardyń jasaǵan qylmysy jeńil nemese orta dárejede bolsa, sonymen qatar qylmys jasaýshy azamattardyń buzylǵan quqyqtaryn qalpyna keltirip, keltirilgen zııannyń ornyn toltyrsa zańnyń izgiligin, keshirimdiligin qoldaný máselesi kózdelgen edi.
«Sol saıasatty iske asyrý barysynda sot salasy biraz sharýalar atqardy. Eger 2009 jyly Qazaqstan Respýblıkasy boıynsha barlyq sottalǵan azamattardyń 18630-na bas bostandyǵynan aıyrý jazasy berilgen bolsa, al 2010 jyly ol 14200 adamǵa berildi. ıAǵnı biz 4 myńnan astam azamatqa bas bostandyǵynan aıyrmaıtyn basqa jazalarmen sottaý arqyly úkim shyǵardyq», - dedi.
Onyń atap ótýinshe, Joǵarǵy sot zańǵa jazany izgilendirýdi kózdeıtin tolyqtyrýlaryn el Parlamentiniń qaraýyna usynǵan. M.Álimbekov áli sheshimin tappaǵan bul máselege halyq qalaýlylary jýyq arada oń qabaq tanytady dep senim artyp otyr.
