Ótken jyly 320 myń turǵyn úıdi satý mámilesi jasaldy
NUR-SULTAN. QazAqparat – 2019 jylǵy qańtar-jeltoqsanda 320 012 turǵyn úıdi satyp alý, satý mámilesi jasaldy, dep habarlaıdy QazAqparat tilshisi.
QR UEM Statıstıka komıtetiniń dereginshe, 2019 jylǵy jeltoqsanda 27 743 turǵyn úıdi satyp alý-satý mámilesi tirkelip, qarasha aıymen salystyrǵanda 6,9 paıyzǵa artty. Bul rette Almaty (1 153), Túrkistan (659) jáne Shyǵys Qazaqstan oblystarynda (594) jeke turǵyn úılerdiń saýda-sattyǵy joǵary boldy.
Al kóppáterli úılerdegi eń kóp baspana saýdasy Almaty (4 991), Nur-Sultan qalalary (3 255) men Qaraǵandy (2 504) oblysynda tirkeldi.
Jalpy, 2019 jylǵy qańtar-jeltoqsanda turǵyn úıdi satyp alý-satý mámileleriniń sany 2018 jylǵy tıisti kezeńmen salystyrǵanda 21 paıyzǵa ósti.
