Ótken jyly 2 myńnan astam adam ata-ana quqyǵynan aıyryldy - BǴM
ASTANA. QazAqparat - Ótken jyly Qazaqstanda 2 myńnan astam adam ata-ana quqyǵynan aıyryldy, dep habarlaıdy QazAqparat tilshisi.
Bul týraly Balalardyń quqyǵyn qorǵaý boıynsha QR Bilim jáne ǵylym mınıstriniń keńesshisi Raısa Sher QR BǴM alqasynyń keńeıtilgen otyrysynda málimdedi.
«Áleýmettik jetimdiktiń aldyn alý máselesi úlken alańdaýshylyq týǵyzyp otyr. Elimizde 15 myń bala qolaısyz otbasynda ósip keledi, 214 myń bala - az qamtylǵan otbasynda tárbıelenýde. Ótken jyly eki myńnan astam ata-ana óz quqyqtarynan aıyryldy», - dedi ol.
Onyń ústine, 5 myńnan astam bala óz otbasynda emes, qazynalyq mekemelerde turyp jatyr.
«Balalar úıinen shyqqandardy baspanamen qamtý jáne postınternattyq áleýmettendirý máselesi de ózekti bolyp qala beredi. Sońǵy bes jylda 265 jetim bala baspana kezegine turǵyzylmaǵan. Muragerlik quqyqtardyń buzylý jaǵdaılary da joq emes. Pavlodar, Almaty, Shyǵys Qazaqstan, Túrkistan, Jambyl, Batys Qazaqstan, Mańǵystaý oblystary men Almaty qalasynda jetim balalardyń múlkin saqtaý boıynsha shara qoldanylmaı otyr», - deıdi keńesshi.
