Ótken jyly 192 sýbekt tutynýshylar artyq tólegen 2 mlrd. teńgeni qaıtardy
ASTANA. 25 aqpan. QazAqparat - Ótken jyly 192 sýbekt tutynýshylar artyq tólegen 2 mlrd. teńgeni qaıtardy. Bul týraly búgin QR Tabıǵı monopolııalardy retteý agenttiginde tutynýshylardyń quqyqtaryn qorǵaýǵa baǵyttalǵan sharalardy talqylaýǵa arnalǵan dóńgelek ústel otyrysynda atalǵan vedomstvo tóraǵasynyń orynbasary Anatolıı Shkarýpa málim etti.
«Ótken jyly agenttikpen tutynýshylarǵa keltirilgen shyǵyndary óteý maqsatynda 192 sýbektige ýaqytsha óteý tarıfteri engizildi. Tutynýshylarǵa qaıtarylǵan jalpy soma 2 mlrd. teńgeni quraıdy», - dedi ol.
Sondaı-aq, 2011-2012 jylý berý maýsymynda syrtqy aýa temperatýrasynyń ózgerýine baılanysty qaıta esepteý nátıjesinde halyqqa qaıtarylǵan soma 907 mln. teńgege jetken.
Jalpy agenttik tóraǵasynyń orynbasary alǵa tartqan derekterge qaraǵanda, 2012 jyly zańdylyqty saqtaý jáne tutynýshylar quqyqtarynyń buzylýyna jol berilmeýin baqylaý aıasynda 471 tekserý júrgizilip, zańnama buzýshylyqtardy joıýǵa 744 nusqama berilgen. Sonymen qatar ákimshilik quqyq buzýshylyq týraly ister boıynsha 382 qaýly shyǵarylǵan. Aıyppul sharalary retinde 205 mln. teńgeden astam qarjy óndirilgen.
