Ótken jyly 188,4 myń ul, 177,8 myń qyz bala dúnıege keldi - Statıstıka
ASTANA. 21 aqpan. QazAqparat - Ótken jyly 188,4 myń ul, 177,8 myń qyz bala dúnıege keldi. Bul aqparatty QR Statıstıka agenttiginiń baspasóz qyzmeti taratyp otyr.
Vedomstvonyń atap ótýinshe, 2010 jylǵy qańtar-jeltoqsanda 188,4 myń ul jáne 177,8 qyz bala dúnıege kelgen, ıaǵnı 100 qyzǵa 106 uldan keledi. Al ótken jylǵy qańtar-jeltoqsan aılarymen salystyrǵanda uldar 1,8, qyzdar - 2,4 paıyzǵa artyq týylǵan.
Respýblıkada 1 jasqa deıingi 6056 (6594) bala ólimi tirkelgen, olardyń ishinde shetinegen ul balalardyń sany - 3483 (3757), qyz balalardyń sany - 2573 (2837) quraıdy. Náreste óliminiń koeffıtsıenti 1000 sábıge shaqqanda 16,6 (18,4) ólimdi qurap otyr. Náresteler shetineýiniń negizgi sebebi - perınataldyq kezeńde paıda bolatyn jaǵdaılar. Sonyń saldarynan 2010 jyldyń 12 aıynda 3603 (4028) náreste kóz jumǵan nemese barlyq náresteler óliminiń 59,5 paıyzyn (61,1%) quraıdy.
Ótken jyl ishinde 80,7 myń azamat jáne 65,2 myń áıel qaza tapqan. 2009 jylǵy qańtar-jeltoqsanmen salystyrǵanda erler 1,8, áıelder - 1,3 paıyzǵa artyq qaza bolǵan. Halyq óliminiń negizgi sebepteri arasynda aıtarlyqtaı úlesti qan aınalymy júıesi aýrýlary alady. Olardyń úlesine barlyq tirkelgen ólim oqıǵalarynyń 45,1 paıyzy (46,5%) tıesili. Jazataıym oqıǵalardan, ýlaný men jaraqattanýdan ólgender sany 17,8 myń (17,5 myń), olardyń ishinde kisi qolynan qaza tapqandar 1,5 myń (1,6 myń), ózin-ózi qol jumsaǵandar 3,6 myń (3,9 myń) jáne jol-kólik oqıǵalarynan mert bolǵandar 3,4 myń (3,3 myń) adamdy quraıdy.
