Ótken jyly 100 myńnan asa otbasynyń baspana máselesi sheshilgen
ASTANA. QazAqparat - 2018 jyly 113 myńnan asa otbasy turǵyn úı jaǵdaılaryn jaqsartty. Bul týraly búgin QR Indýstrııa jáne ınfraqurylymdyq damý vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.
«Qurylys salasy jyl saıyn turaqty ósý qarqynyn kórsetip keledi. Jalpy ishki ónim qurylymynda qurylys salasy 5,5 paıyzdy quraıdy. Jalpy osy salaǵa 2018 jyly 3.8 trln teńge ınvestıtsııa jumsaldy, ol ótken jylǵy deńgeıden 4,1 paıyzǵa artyq», - dedi ol mınıstrliktiń keńeıtilgen alqa májilisinde.
Vıtse-mınıstr dereginshe, 2018 jyldyń qorytyndysy boıynsha turǵyn úı qurylysyna 1,2 trln teńge ınvestıtsııa tartyldy. Ol 2017 jylǵy deńgeıden 8,1 paıyzǵa kóp.
«Nátıjesinde jumsalǵan 1 teńge memlekettik qarajatqa 6 teńge jeke ınvestıtsııa tartyldy. 113 myńnan asa otbasy óz turǵyn úı jaǵdaılaryn jaqsartty. Bul 2017 jyldyń deńgeıinen 12,8 paıyzǵa joǵary. Sońǵy 5 jyl ishinde turǵyn úı engizýdiń kólemi 1,7 esege ósti. Turǵyn úı salasyndaǵy ınvestıtsııalar kóleminiń ósýi eki eseden asty», - dedi Qaıyrbek Óskenbaev.
