Ótken jyly 1 mln. 800 myńǵa jýyq azamat «Apattar medıtsınasy temirjol gospıtaldary» mamandarynyń kómegin aldy - alqa májilisi
ASTANA. 1 aqpan. QazAqparat /Aıdar Ospanalıev/ - «Apattar medıtsınasy temirjol gospıtaldary» aktsıonerlik qoǵamynyń ókilderi ótken jyl boıyna 1 mıllıon 793 myń 713 azamatqa kómek kórsetti.
Bul týraly búgin Tótenshe jaǵdaılar mınıstrliginiń 2011 jyly atqarǵan jumystaryna baılanysty ótken alqa májilisinde atalmysh vedomstvo basshysy Vladımır Bojko málim etti.
Onyń aıtýynsha, ótken jyly elde, ásirese, apat medıtsınasy jaqsy damydy. «Bul qyzmet túri boıynsha bizde Apatty medıtsına ortalyǵy men onyń 11 fılıaly, 18 temirjol gospıtali, 310 medıtsınalyq beketter, 3 poıyz ben trassalyq medıtsınalyq qutqarý kóligi bar. Osylardyń ishinde tek ótken jyly ǵana «Qazaqstan temir joly» ulttyq kompanııasymen jiberilgen medıtsınalyq poıyzdar 212 shaǵyn stansylar men olardyń aımaǵyndaǵy aýyldardyń 84 myńnan astam turǵynyna kómek kórsetti. Al «Apattar medıtsınasy temirjol gospıtaldary» aktsıonerlik qoǵamynyń ókilderi ótken jyl boıyna 1 mıllıon 793 myń 713 azamatqa kómek kórsetti. Bul medıtsına mamandarynan qurylǵan úlken top jáne olar kez kelgen apatty jaǵdaıda azamattarǵa qol ushyn sozýǵa daıyn»,-dedi mınıstr.
