Ótken jylmen salystyrǵanda jumyspen qamtylǵandar 63,1 myń adamǵa artty
ASTANA. QazAqparat - Respýblıka ekonomıkasynda 2014 jylǵy maýsymda 8,6 mln. adam jumyspen qamtyldy. Ótken jylǵy sáıkes kezeńge qaraǵanda olardyń sany 63,1 myń adamǵa nemese 0,7 paıyzǵa kóbeıdi. Bul týraly QR Statıstıka agenttiginen habarlandy.
Jaldamaly qyzmetkerlerdiń sany atalǵan kezeńde 6 mln. adamdy (jumyspen qamtylǵandardyń jalpy sanynan 69,8%) qurady.
«2014 jylǵy II toqsannyń aldyn ala derekteri boıynsha óz betinshe jumyspen qamtylǵandardyń jalpy sanynan jumyspen nátıjeli qamtylǵandar úlesi 70 paıyzdy, jumyspen nátıjesiz qamtylǵandar - 30 paıyzdy qurady», - delingen agenttik málimetinde.
2014 jylǵy maýsymda jumyssyzdar sany baǵalaý boıynsha 459,8 myń adamdy, jumyssyzdyq deńgeıi 5 paıyzdy qamtydy. QR Eńbek jáne halyqty áleýmettik qorǵaý mınıstrliginiń jumyspen qamtý organdarynda 2014 jylǵy maýsym aıynyń sońyna 55,6 myń adam («Jumyspen qamtý 2020 jol kartasy» baǵdarlamasyna qatysatyndar quramyna engizilgen azamattardyń esebinsiz) resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,6 paıyzyn qurady (2013 jylǵy maýsymda - 0,7%).
2014 jylǵy 1 maýsymdaǵy jaǵdaı boıynsha jasyryn jumyssyzdyq deńgeıi ekonomıkalyq turǵydan belsendi halyqtyń 0,3 paıyzyn qamtydy.
