Ótken jylmen salystyrǵanda JKO sany 6,7 paıyzǵa tómendedi
ASTANA. QazAqparat - Ótken jylmen salystyrǵanda jol-kólik oqıǵalary sany 6,7 paıyzǵa tómendedi. Bul týraly 2014 jyldyń 9 aıyndaǵy Qazaqstan joldaryndaǵy jaǵdaıy týraly QR Bas prokýratýrasy Quqyqtyq statıtıska jáne arnaıy esepke alý jónindegi komıtettiń baspasóz qyzmetinen habarlandy.
«Osy rette qaza bolǵan adamdardyń sany da 15,3 paıyzǵa azaıdy. Bul óz kezeginde ýákiletti organdar tarapynan jol qozǵalysy qaýipsizdigi salasyndaǵy josparly aldyn alý jumystarynyń nátıjesinen jáne azamattardyń qaýipsizdik turǵysynda túsiniginiń joǵarylaýynan bolyp otyrǵan jaǵdaı deýge bolady», - delingen komıtet habarlamasynda.
Aıta keteıik, Respýblıkada 2014 jyldyń 9 aıynda 14 367 jol-kólik oqıǵasy tirkeldi. «Bul rette JKO saldarynan 1 810 qaza bolǵandardyń ishinde 187-si - kámeletke tolmaǵandar. Al jaraqat alǵan 18 289 adamnyń arasynda 3 435-i - kámeletke tolmaǵandar», delingen komıtet málimetinde.
