Ótken jylmen salystyrǵanda qoǵamdyq oryndarda oryn alǵan qylmystardyń ashylýy 7,2 paıyzǵa artty - Almaty
ALMATY. 23 qańtar. QazAqparat /Názıra Eleýhan/ - Ótken 2011 jyly Almaty polıtsııasynyń keshendi kúshimen qoǵamdyq oryndarda oryn alǵan 3 myń qylmystyq is ashyldy.
Onyń 1000-nan astamy qasaqana túrde jasalǵan. Qylmystyq isterdiń basym bóligin ár mınýt saıyn qoǵamdyq tártipti qadaǵalap otyratyn patrýldik polıtsııa ashyp otyr.
«Ótken jylmen salystyrǵanda qoǵamdyq oryndarda oryn alǵan qylmystardyń ashylýy 7,2 paıyzǵa artty. Saraptama kórsetkendeı, tonaýshylyq, qaraqshylyq shabýyl, buzaqylyq oqıǵalary kóbine qalanyń shetki aýdandarynda oryn alýda. Sondyqtan da bizdiń qyzmet sol aýdandarda kúzetti kúsheıtýde. Jol polıtsııasy, patrýldik polıtsııa jáne jaıaý kúzettiń kópshiligi sol aýmaqtarda shoǵyrlandyryp otyrmyz. Qoǵamdyq tártip jaǵdaıyn jaqsartýdy ishki mıgratsııalyq úderis qıyndatyp otyr. 9 aıdyń ishinde basqa jerlerden, ıaǵnı shetten kelýshiler jeńil nápaqa tabý maqsatynda qoǵamdyq oryndarda 1663 qylmys jasady. Máselen, jaqynda pyshaqpen qorqytyp, jasóspirimniń aqshasy men qalta telefonyn alyp ketken eki jigit ustaldy. Olardyń ekeýi de Jambyl oblysy, Rysqulov aýdanynan kelgen. Qylmyskerler zattyq aıǵaqpen sol jerde ustaldy»,-dedi Almaty qalasy boıynsha Qoǵamdyq qaýipsizdik basqarmasynyń basshysy, podpolkovnık Serik Kenenbaev.
Onyń aıtýynsha, qazirgi ýaqytta da qoǵamdyq oryndar men kóshelerde qylmystardy azaıtý maqsatynda keshendi sharalar jalǵasýda.
«Búginde qalanyń krımınagendi sanalatyn aýdan ýchaskelerinde jeti «Granıt» jyljymaly polıtsııa pýnkteri jumys isteıdi. Qala boıynsha túngi ýaqyttary izdeý toptary kezekshilik jasaıdy», -dedi S. Kenenbaev.
