Ótken jyldyń ekinshi jartysynda «Jumyspen qamtý - 2020» baǵdarlamasy boıynsha 37,5 myń adam qamtyldy
ASTANA. 7 aqpan. QazAqparat /Aıdar Ospanalıev/ - «Jumyspen qamtý - 2020» baǵdarlamasy boıynsha atqarylǵan jumystar 2011 jyly atqarýshy organdardyń osy baǵdarlama boıynsha jetildirýdi qajet etetin joldardy anyqtaýǵa múmkindik berdi»,
dedi búgin Eńbek jáne halyqty áleýmettik qorǵaý mınıstri Gúlshara Ábdihalyqova on-laın rejiminde ótken Úkimettiń selektorlyq májilisinde.
Onyń aıtýynsha, atalmysh baǵdarlama júzege asyryla bastaǵan qysqa merzimde qajetti normatıvtik-quqyqtyq aktiler daıyndalyp, Úkimet janynan vedomstvoaralyq komıssııa quryldy. Sondaı-aq osyndaı komıssııalar oblystarda jáne Astana men Almaty qalalarynda, sondaı-aq aýdandyq deńgeıde de quryldy.
«Mınıstrlik jergilikti atqarýshy organdarmen birlese otyryp, baǵdarlama boıynsha medıa-jospar qurdy. Eldegi árbir qalanyń jáne aýdannyń deńgeıinde baǵdarlamany júzege asyrý úshin 204 turǵyndy jumyspen qamtý ortalyǵy quryldy. Buǵan qosa baǵdarlama aıasynda avtomattandyrylǵan «Eńbek naryǵy» júıesi iske qosyldy. Bul júıe naqty ýaqyt rejiminde baǵdarlamanyń júzege asyrylýyna monıtorıng jasaýǵa múmkindik beredi»,-dedi mınıstr.
Onyń derekterine qaraǵanda, «Jumyspen qamtý - 2020» baǵdarlamasy boıynsha 84 myńnan astam adam ótinish bildirip, olardyń 58,6 myńy áleýmettik kelisim-sharttar jasaǵysy keletindikterin bildirdi. «Ótken jyldyń ekinshi jartysynda atalmysh baǵdarlama boıynsha 37,5 myń adam jumyspen qamtylyp, qosymsha oqytý sharalaryn júzege asyrmastan vakansııaly jumys oryndaryna 6,3 myń adam ornalastyryldy. Áleýmettik kelisim-shartqa qol qoıǵan azamattardyń 60 paıyzdan astamy jumyssyzdar, 36 paıyzy ózderin-ózderi jumyspen qamtyǵan azamattar. Al 5 paıyzy áleýemttik jaǵynan az qamtylǵan azamattar. Baǵdarlamaǵa qatysýshylardyń arasynda 29-ǵa deıingi jastar 60 paıyzdy quraıdy»,-dedi G.Ábdihalyqova.
