Ótken jyldyń 9 aıynda sheteldik ınvestıtsııa kólemi 17,8% ósken

ASTANA. QazAqparat - QR Premer-Mınıstri Álıhan Smaıylov iri sheteldik kompanııalardyń, dıplomatııalyq korpýs pen ortalyq memlekettik organdardyń jáne «Atameken» UKP ókilderiniń qatysýymen Investıtsııalyq ahýaldy jaqsartý jónindegi keńestiń kezekti otyrysyn ótkizdi, dep habarlaıdy QazAqparat.

Álıhan Smaıylov syrtqy syn-qaterlerge qaramastan, 2022 jyldyń qorytyndysy boıynsha Qazaqstan ekonomıkasy oń ósý qarqynyn kórsetip, ınvestıtsııalyq tartymdylyǵyn saqtap qalǵanyn atap ótti. Atap aıtqanda, ótken jyldyń 9 aıynda respýblıkaǵa tartylǵan tikeleı sheteldik ınvestıtsııalardyń jalpy kólemi 17,8%-ǵa ósip, $22,1 mlrd-ty qurady.

«Jańa ekonomıkalyq jaǵdaıda QR Úkimeti sheteldik ınvestorlardyń jumysy úshin qolaıly jaǵdaı jasap keledi. Bıznes-jobalarǵa turaqty negizde fıskaldyq jáne fıskaldyq emes jeńildikterdi, sondaı-aq preferentsııalardy qamtıtyn jan-jaqty qoldaý kórsetilip otyr», — dedi Úkimet basshysy.

Qoldaýdyń jańa quraldary týraly aıta otyryp, Premer-Mınıstr Investıtsııalyq mindettemeler týraly kelisimdi, Jaqsartylǵan modeldik kelisimshartty jáne Investıtsııalar týraly kelisim jasaý protsesin jeńildetýdi atap kórsetti.

Premer-Mınıstrdiń aıtýynsha, Qazaqstannyń ınvestıtsııalyq tartymdylyǵyn jaqsartýdyń taǵy bir mańyzdy qyry – boljaýǵa bolatyn jáne ashyq salyq saıasaty. Osyǵan baılanysty fıskaldyq retteýdi qaıta qaraý úshin jańa Salyq kodeksi ázirlenip jatyr. Ol salyqtyq baqylaýdy tsıfrlandyrýdy, saralanǵan mólsherlemelerge kóshýdi, tehnologııalyq jańǵyrtýdy yntalandyrýdy, arnaýly salyq rejımderin ońaılatýdy jáne t. b. kózdeıdi.

Otyrys aıasynda qatysýshylar bıznes úshin ákimshilik kedergilerdi joıý, salyq salýdy jetildirý, jańa tehnologııalardy damytý, jahandyq ekonomıkalyq trendterdiń Qazaqstan ekonomıkasyna áseri jáne t.b. máselelerdi talqylady.

Shara qorytyndysy boıynsha Premer-Mınıstr Úkimettiń ózara tıimdi yntymaqtastyqty arttyrýǵa baǵyttalǵan pikirtalastarǵa, usynymdarǵa jáne jańa jobalarǵa ashyq ekenin atap ótti.

«Biz Qazaqstannyń ınvestıtsııalyq klımatyn jaqsartýǵa belsendi túrde qatysyp jatqan sheteldik áriptester men dıplomatııalyq korpýstyń jumysyn joǵary baǵalaımyz. Óz tarapymyzdan keleshegi bar jobalarǵa qajetti qoldaý kórsetýge daıynbyz», — dep túıindedi Álıhan Smaıylov.