Ótken jyldary memlekettik turǵyn úıge ıe bolǵan azamattar «Turǵyn-úı jınaq bankinen» nesıe ala alady - basqarma dırektory Danııar Toıbaev
ASTANA. Qańtardyń 20-sy. QazAqparat /Arman Asqarov/ - 2005-2007 jyldarǵa arnalǵan Memlekettik turǵyn-úı baǵdarlamasy aıasynda páter alǵan azamattardyń «Turǵyn-úı jınaq bankinen» nesıe alýǵa múmkindigi bar.
Bul týraly búgin elordada ótken baspasóz máslıhaty barysynda «Turǵyn-úı jınaq banki» AQ-synyń basqarma dırektory Danııar Toıbaev málim etti, dep habarlaıdy QazAqparat.
«Turǵyn-úı jınaq banki 2008-2010 jyldarǵa arnalǵan Memlekettik turǵyn-úı baǵdarlamasynyń operatory bolyp tabylady. Sondyqtan ótken jyldary memlekettik baspanaǵa ıe bolǵan azamattar óz nesıelerin bizdiń bankke aýystyra almaıdy. Biraq eger olar osy kúnge deıin ekinshi deńgeıli banktermen kelisim-shartqa otyrmasa, onda bizge kelip, 4 paıyzdyq mólsherleme kólemindegi turǵyn-úı nesıesin ala alady», - deıdi D.Toıbaev.
