Ótken jyl ishinde prokýrorlar eńbekkerlerdiń 9,3 mıllıard teńge jalaqylaryn alyp berip, 225 myń jumysshynyń quqyqtaryn qorǵady
ASTANA. 12 qańtar. QazAqparat - Prokýratýra organdary azamattardyń eńbek quqyqtaryn qorǵaý sharalaryn jalǵastyrýda.
Ótken jyl ishinde olar eńbekkerlerdiń quny 9,3 mıllıard teńgeden asatyn jalaqylaryn alyp berip, 225 myń jumysshynyń buzylǵan quqyqtaryn qalpyna keltirdi. Bul týraly búgin jýrnalıstermen bolǵan brıfıngte Bas prokýratýranyń resmı ókili Jandos Ómiralıev málim etti.
Onyń aıtýynsha, prokýrorlardyń uıǵarymynyń negizinde «PSK Kókshetaýqurylys» jaýapkershiligi shekteýli seriktestigi 250 jumysshynyń quny 15 mıllıon 880 myń 604 teńge bolatyn jalaqylaryn tolyǵymen tólegen. Al Astanada prokýrorlyq sharalardyń nátıjesinde 8 kásiporyn 103 mıllıon teńge qaryzdaryn ótedi. Almaty qalasynda jeltoqsan aıynyń ózinde 200 mıllıon teńgeniń bereshegi qaıtaryldy. «Qazirgi tańda prokýrorlardyń basty nazarynda jumysshylardyń eńbek quqyqtaryn buzýǵa kináli azamattardy jaýapqa tartý tur. Osy másele boıynsha eńbekkerlerge tólenýi tıis 8 mıllıon 851 myń 929 teńgeni jeke múddesi úshin jaratyp jibergen «Olja Álem» jaýapkershiligi shekteýli seriktestiginiń dırektory sottaldy», dedi resmı ókil.
Onyń sózine qaraǵanda, ótken jyldyń qorytyndysy boıynsha zańbuzýshylyqtardy joıý maqsatynda prokýrorlar 1 myń 542 usynys, 627 uıǵarym engizip, 1 myń 60 túsindirý jumystaryn júrgizgen. Al jalaqyny tólemeý áreketi boıynsha 34 qylmystyq is qozǵap, 1 myń 651 adamdy ákimshilik jaýapqa, 1 myń 326 adamdy tártiptik jaýapqa tartqan.
