Ótken jumada Qaraǵandy óńirinde jaýǵan qardan esh qaýip joq
ASTANA. QazAqparat - Ótken jumada jaýǵan qar aımaqtaǵy kóktemgi sý tasqynyna qatysty jaǵdaıǵa áser etpeıdi. Ol jaıly apparattyq jınalys barysynda Qaraǵandy oblysy ákiminiń orynbasary Anatolıı Shkarýpa málimdedi.
«Senbide, jaýǵan qarǵa baılanysty ylǵal qory ulǵaıdy. Alaıda Shet, Jańaarqa jáne Nura aýdandarynda kóktemgi sý tasqynyna qatysty jaǵdaı baqylaýda. Oblysymyzdyń aýmaǵynda sý kelý kórsetkishteri tómendeýde. Ylǵal qory da azaıyp barady, tipti jýyrda jaýǵan qardyń kólemine qaramastan, jaǵdaı qalypty. Sınoptıkterdiń boljaýynsha, sáýirdiń besine deıin túngi aýa temperatýrasy tómen bolsa, kúndiz joǵarylaıdy. Mundaı jaǵdada qar baıaý erıdi. Sáýirdiń besinen keıin aýa temperatýrasy túngi mezgilde de jylıtyn bolady. Qazir Nura ózenindegi sýdyń qory jaýǵan jaýyndy esepke alǵanda 248 mln tekshe metrdi qurap otyr.», - dep sendirdi Anatolıı Shkarýpa.
Mamandardyń aıtýynsha, bul qaýip týdyratyndaı kórsetkish emes.
«Búgingi tańda Samarqan sý qoımasy qosymsha 65 mıllıon tekshe metr syıdyra alady. Sý qoımasy 175 mln tekshe metr sý qabyldady, onyń 149-y shyǵaryldy», - dep málimdedi «Qazsýsharýashylyǵy» RMM Qaraǵandy oblystyq fılıalynyń dırektory Dúısembaı Ábjanov.
Anatolıı Shkarýpanyń aıtýynsha, qalalar men aýdandardyń ákimderi turaqty túrde ózderine tıesili aýmaqtardaǵy kóktemgi sý tasqyny jaǵdaıy týraly esep berip otyrady. Ol óz kezeginde sý tasqyny boıynsha der kezinde durys sheshim qabyldap, jaǵdaıda baqylaýda ustaýǵa múmkindik beredi.
