Ótken jylytý maýsymynda 175 adam órtten qaza tapqan
ASTANA. KAZINFORM — Elimizde ótken jylytý maýsymynda turǵyn úılerde 3 359 órt tirkelip, 175 adam qaza tapqan. Bul týraly Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Rýslan Qaıraqbaev brıfıngte málim etti.
Onyń aıtýynsha, aldyńǵy jylytý maýsymymen salystyrǵanda órt sany 16 paıyzǵa azaıǵan.
— Ótken jylytý maýsymynda 3 359 órt tirkeldi. Aldyńǵy maýsymda bul kórsetkish 3 983 bolǵan. Órtten qaza tapqandar sany 3,3 paıyzǵa, jaraqat alǵandar sany 28 paıyzǵa tómendedi, — dedi Rýslan Qaıraqbaev.
Aldyńǵy jylytý maýsymynda órtten 181 adam qaza taýyp, 173 adam jaraqat alǵan. Al ótken maýsymda 175 adam kóz jumyp, 125 adam jaraqat alǵan.
TJM ókili órt sanynyń azaıýyna jergilikti atqarýshy organdarmen birlesip júrgizilgen aldyn alý sharalary yqpal etkenin atap ótti.
Bıyl da órttiń aldyn alý jumystary jylytý maýsymy bastalmaı turyp qolǵa alyndy. 15 tamyzdan beri elimizde respýblıkalyq órt qaýipsizdigi aktsııasy ótip jatyr. Onyń aıasynda mamandar turǵyn úılerdi aralap, peshter men elektr jabdyqtaryn qaýipsiz paıdalaný tártibin túsindirip júr.
Eske sala keteıik, buǵan deıin Tótenshe jaǵdaılar mınıstrligi jylytý maýsymy qarsańynda turǵyndarǵa elektr symdary men jylytý peshteriniń jaramdylyǵyn tekserip, órt qaýipsizdigi talaptaryn saqtaýdy eskertken edi.
