Ótken jyly jumys berýshiler jumyskerlerdiń paıdasyna 760 mlrd teńge zeınetaqy jarnasyn aýdardy

ASTANA. KAZINFORM - 2025 jyly jumys berýshiler 5 514 050 jumyskerdiń paıdasyna 760 mlrd teńge somasyna mindetti zeınetaqy jarnalaryn aýdardy.

QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, 2024 jyldyń 1 qańtarynan bastap Qazaqstanda jumys berýshiniń mindetti zeınetaqy jarnalary (budan ári – JMZJ) engizildi, olar óz qyzmetkerleriniń paıdasyna ózderiniń qarajaty esebinen tólenedi.

2024 jyly JMZJ mólsherlemesi 1,5%, 2025 jyly – 2,5%, 2026 jyly - 3,5% qurady. Keıinnen 2028 jylǵa qaraı mólsherleme 5%-ǵa deıin jetkiziledi.

Jumys berýshilerdiń JMZJ aýdarýy jumyskerlerdi qartaıǵan shaǵynda ómir boıy qosymsha jınaqtaýshy zeınetaqy tólemimen qamtamasyz etýge múmkindik beredi.

Atalǵan shara qazaqstandyqtardyń jas býynyn qoldaýǵa baǵyttalǵan, olardyń zeınetaqy mólsheri zeınetaqy aýdarymdaryna tikeleı baılanysty bolady. Olardyń zeınetaqysy úsh komponentten quralady: memleketten bazalyq zeınetaqy, jınaqtaýshy – Biryńǵaı jınaqtaýshy zeınetaqy qoryna óz aýdarymdary esebinen jáne shartty-jınaqtaýshy – jumys berýshilerdiń jarnalary esebinen bolady.

JMZJ tóleýdi jumys berýshiler 1975 jylǵy 1 qańtardan keıin týǵan adamdar úshin ǵana júzege asyrady.

QR Salyq kodeksine sáıkes JMZJ tóleý boıynsha jumys berýshiniń shyǵystary salyq salynatyn tabystan shegerimge jatqyzylǵanyn atap ótý qajet. Tıisinshe, jumys berýshige júkteme qolaıly deńgeıde qalady.

Osyǵan deıin qazaqstandyqtarǵa 4 trln 225 mlrd teńge somasyna zeınetaqy tólengeni týraly habarladyq.