Ótken jyly temirjol kóligimen júkterdi tasymaldaý 5,5 paıyzǵa artty
ASTANA. KAZINFORM - 2025 jyldyń qorytyndysy boıynsha temirjol kóligimen júkterdi tasymaldaý kólemi 320 mln tonnaǵa deıin jetti, bul 2024 jylǵy kórsetkishten 5,5%-ǵa artyq, dep habarlaıdy QR Kólik mınıstrliginiń baspasóz qyzmeti.
Baspasóz qyzmetiniń málimetterine qaraǵanda, respýblıkaishilik qatynasta 2024 jylmen salystyrǵanda 2,7% ósimmen 177 mln tonna júk tasymaldandy.
Eksporttyq qatynasta tasymaldaý kólemi 89,2 mln tonnaǵa deıin ulǵaıyp, 2024 jylǵy deńgeıden 7,2%-ǵa asty, al ımporttyq tasymaldar 20,7 mln tonnaǵa (+2,7%) jetti. Eń úlken ósim tranzıttik qatynasta tirkeldi.
Jyl qorytyndysy boıynsha tranzıttik tasymaldaý kólemi 33 mln tonnany qurady, bul 2024 jylmen salystyrǵanda 19,9%-ǵa artyq. Sonymen qatar, astyq tasymalynyń aıtarlyqtaı ósimi baıqalady.
2025 jyldyń qorytyndysy boıynsha temirjol kóligimen 14,3 mln tonna astyq tasymaldandy, bul 2024 jylmen salystyrǵanda 31%-ǵa artyq (10,8 mln tonna). Jalpy kólemmen eksportqa 11 mln tonna (+33%) jiberildi, respýblıkaishilik qatynasta 3,3 mln tonna (+26%) tasymaldandy.
Ortalyq Azııa, Iran, Aýǵanstan jáne Reseı elderin qosa alǵanda, eksporttyń negizgi baǵyttary boıynsha turaqty oń dınamıka baıqalady.
- Astyqty qaıta óńdeý ónimderin tasymaldaýdy ulǵaıtý esebinen eleýli ósim qamtamasyz etildi: QHR-da azyqtyq unnyń kólemi 3,1 mln tonnaǵa jetip, 3,8 esege ósti, bul qosylǵan quny joǵary ónim óndirisiniń keńeıýin kórsetedi. Sondaı-aq, 2025 jyly Afrıka, Vetnam jáne Eýropalyq odaq memleketterin qosa alǵanda, jańa eksporttyq naryqtar ashyldy. Jalpy, 2025 jyldyń nátıjeleri temirjol kóliginiń turaqty jumys isteýin jáne júk tasymaly damýynyń oń dınamıkasyn kórsetedi, - delingen habarlamada.
Al bıyl temirjol salasynda ne ózgeredi. Bul týraly myna mateıaldan oqýǵa bolady.