Ótken jyly syrtqy kóshi-qon saldosy oń dınamıka kórsetti - alqa otyrysy

ASTANA. KAZINFORM – 2025 jyldyń qorytyndysy boıynsha syrtqy kóshi-qon saldosy oń dınamıka kórsetip, +16,1 myń adamǵa deıin ósti, dep málimdedi búgin QR Eńbek jáne halyqty áleýmettik qorǵaý mınıstri Asqarbek Ertaev vedomstvonyń alqa otyrysynda.

Aıta keteıik, otyrys barysynda vedomstvo quzyryndaǵy kóptegen máselelermen qatar kóshi-qon protsesterin retteý jumystary da qaraldy.

- Memleket basshysynyń tapsyrmalaryn iske asyrý sheńberinde memlekettik kóshi-qon saıasaty ulttyq ekonomıkanyń qajettilikterine baǵdarlanǵan barynsha pragmatıkalyq modelge kóshý ústinde. Osy maqsatta 2030 jylǵa deıingi Kóshi-qon saıasatynyń jańa tujyrymdamasy bekitildi, ol kóshi-qondy retteýdegi uzaqmerzimdi baǵyttardy anyqtaıdy. Aıtylǵandaı, 2025 jylǵy qorytyndy boıynsha syrtqy kóshi-qon saldosy oń dınamıka kórsetti jáne +16,1 myń adamǵa deıin ósti, - dedi mınıstr.

Sondaı-aq ol baıandamasynda ımmıgranttardy qabyldaý kezinde tek shyǵý tegi faktoryn ǵana emes, sonymen qatar keletin azamattardyń kásibı áleýetin baǵalaý basym baǵytqa aınalyp otyrǵanyn habarlady.

Іshki eńbek naryǵynda suranysqa ıe beıindik bilimi, jumys tájirıbesi men quzyretteri bar joǵary bilikti mamandarǵa sózsiz basymdyq beriletin bolady. 2030 jylǵa qaraı keletin azamattar arasyndaǵy bilikti kadrlardyń úlesin 95%-ǵa deıin jetkizý josparlanyp otyr.

Osy tásilderdi iske asyrý úshin mınıstrlik «migration.enbek.kz» mamandandyrylǵan platformasy bazasynda pılottyq jobany iske qosty. Іlki joba aıasynda turaqty turýǵa ruqsat berý jáne «qandas» mártebesin berý jónindegi qyzmetter ımmıgranttyń áleýetin keshendi baǵalaý (skorıng) negizinde kórsetiledi.

Sonymen qatar, kóshi-qon aǵyndaryn keshendi elektrondy monıtorıngteý jáne esepke alý maqsatynda «Kóshi-qon polıtsııasy» AJ negizinde sheteldik azamattardy esepke alýdyń birtutas tsıfrlyq arhıtektýrasyn qurý týraly sheshim qabyldanyp, ony QazETA aqparattyq júıesimen qatar qoldaný kózdelgen.

- Sheteldik jumys kúshi úshin alymdar mólsherlemelerin qaıta qaraýdy, jeke jumyspen qamtý agenttikteriniń qyzmetin qatań retteýdi jáne sheshim qabyldaý kezinde tsıfrlyq skorıngti tolyq aýqymdy engizýdi kózdeıtin zań jobasy daıyndaldy. Bizdiń mindetimiz – otandyq jumyskerlerdiń múddelerin qorǵaıtyn jáne ekonomıkany qajetti kadrlarmen qamtamasyz etetin ashyq júıe qurý, – dep atap ótti Asqarbek Ertaev.

Mınıstrlik syrtqy aǵyndardy retteýmen qatar, ishki kóshi-qondy basqarý boıynsha jumysty kúsheıtip otyr. Demografııalyq teńgerimdi qamtamasyz etý jáne kásiporyndardyń kadrlyq tapshylyǵyn jabý maqsatynda azamattardy elimizdiń jumys kúshi tapshy soltústik óńirlerine qonys aýdarýdy yntalandyrý jónindegi Jol kartasy qatar iske asyrylýda.

- Qazirdiń ózinde bul aımaqtarǵa halyq aǵynynyń ósýi baıqalýda: 2025 jylǵy qorytyndy boıynsha ishki mıgranttardyń jalpy sanynyń 14,7%-y óńirler aralyq qonys aýdarýǵa qatysty. Jańa Tujyrymdama aıasynda bolashaqtaǵy negizgi mindetterdiń biri – eńbekke qabiletti qonys aýdarýshylar men qandastardy 100% jumyspen qamtý ,- dedi Asqarbek Ertaev.

Alqaǵa qatysýshylar atalǵan blokty talqylaýdy túıindeı kele, basqarylatyn jáne ashyq kóshi-qon júıesin qurý óńirlik eńbek naryqtaryn tıimdi teńdestirýge jáne zańsyz eńbek kóshi-qony táýekelderin barynsha azaıtýǵa múmkindik beretinin atap ótti.

Osyǵan deıin Eńbek mınıstrliginiń 2026 jyly jarty mıllıonnan astam adamdy jumysqa ornalastyrýdy josparlap otyrǵany týraly jazdyq.