Ótken jyly salyq pen kedendik ákimshilendirýge 226 myń shaǵym túsken – Úkimet otyrysy

ASTANA. KAZINFORM – QR Premer-Mınıstri Oljas Bektenov jańa Salyq kodeksin ázirleý sozylyp bara jatqanyn synǵa aldy. Ótken jyly memlekettik kirister organdarynyń jumysy men áreketsizdigine, qosylǵan qun salyǵyn qaıtarýdy keshiktirýge, mámilelerdi jaramsyz dep tanýǵa qatysty 226 myńǵa jýyq shaǵym túsken.

O.Bektenov Úkimet aldynda salyqtyq jáne kedendik ákimshilendirýdiń tıimdiligin arttyrý baǵytynda mańyzdy mindet turǵanyn atap ótti.

«Osy maqsatqa jetýdiń eń ońtaıly joly – barlyq protsesterdi barynsha tsıfrlandyrý. Jańa Salyq kodeksi ázirlenip jatyr. Oǵan qoıylatyn talap óte qatań. Buǵan deıin usynylǵan tásilderge qatysty oryndy syn aıtylǵan bolatyn. Bıznes pen qoǵam bul qujattan oń ózgerister kútip otyr. Eń bastysy, ol ashyq, bárine túsinikti jáne úılesimdi bolýy kerek», - dedi Premer-Mınıstr búgingi Úkimet búgingi otyrysynda.

Alaıda Úkimet basshysy Kodeksti ázirleý sozylyp bara jatqanyn, bul jumysty jedel aıaqtaý qajettigin eskertti.

«2023 jyldyń qorytyndysy boıynsha halyqtan salyqtyq jáne kedendik ákimshilendirý máselelerine qatysty 226 myńǵa jýyq ótinish pen aryz-shaǵym kelip túsken. Olar negizinen memlekettik kirister organdarynyń jumysy men áreketsizdigine, qosylǵan qun salyǵyn qaıtarýdy keshiktirýge, mámilelerdi jaramsyz dep tanýǵa jáne taǵy basqa máselelerge qatysty boldy. Jańa kodekste osylardy eskerý, ákimshilendirýdiń servıstik modeline nazar aýdarý qajet», - dedi O. Bektenov.

«Salyq komıteti men Kedendik baqylaý komıteti biriktirilip, ornyna Memlekettik kirister komıteti qurylǵannan beri 9 jyldan astam ýaqyt ótti. Alaıda salyqtyq jáne kedendik aqparattyq júıelerdi ıntegratsııalaý jumystary áli bitken joq. Ony bıylǵy jyldyń sońyna deıin aıaqtaý qajet. Bul – sońǵy merzim», - dedi Úkimet basshysy.