Ótken jyly Qazaqstannyń syrtqy taýar aınalymy 141,4 mıllıard AQSh dollary boldy

ASTANA. KAZINFORM – Ótken jyly Qazaqstannyń syrtqy taýar aınalymy 141,4 mıllıard AQSh dollary boldy. Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty. 

— Jahandyq syn qaterlerge qaramastan mınıstrlik úshin ótken jyl qyzmettiń barlyq baǵyttary boıynsha oń serpinmen aıaqtaldy. Ótken jyly saýdanyń ósýi 9,1 paıyzdy qurady. Saýda salasyna 884,6 mıllıard teńge ınvestıtsııa tartyldy. Bul 2023 jylmen salystyrǵanda 14,6 paıyzǵa kóp. Іshki taýar aınalymy da turaqty oń dınamıkada qalyp otyr. Máselen, ótken jyldyń qorytyndysy boıynsha ishki taýar aınalymy 14,1 paıyzǵa ósip, 69,6 trıllıon teńgeni qurady. Qazaqstannyń syrtqy taýar aınalymy 141,4 mıllıard AQSh dollary boldy. Bul 2023 jylmen salystyrǵanda 1,6 mıllıard AQSh dollar artyq ósken, - dedi mınıstr.

Vedomstvo basshysynyń dereginshe, saýda balansy 3,1 mıllıard AQSh dollarǵa ósip, 21,8 mıllıard AQSh dollaryna jetti. Taýarlar men qyzmetterdiń shıkizattyq emes eksportynyń kólemi ótken jyly 10,7 paıyzǵa artyp, 40,2 mıllıard AQSh dollaryn qurady.

— Áleýmettik mańyzy bar azyq-túlik taýarlary baǵasynyń ındeksi 1,4 paıyzdy ǵana qurady. Bul sońǵy 10 jyldaǵy eń jaqsy kórsetkish. Jalpy saýda — ulttyq ekonomıkanyń negizgi salalarynyń biri. Jumyspen jáne ekonmıkany turaqty qamtýyna yqpal etedi, - dedi ol.