Ótken jyly Qazaqstan men Vetnamnyń AÓK ónimderi boıynsha saýda kólemi 3,5% ósken
ASTANA. KAZINFORM - Qazaqstanǵa memlekettik saparmen kelgen Qazaqstan Respýblıkasynyń Premer-mınıstri Oljas Bektenov pen Vetnam Sotsıalıstik Respýblıkasy Kommýnıstik partııasy Ortalyq komıtetiniń Bas hatshysy To Lam ekijaqty saýda-ekonomıkalyq yntymaqtastyq máselelerin talqylady, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaev pen Vetnam Kommýnıstik partııasy Ortalyq komıtetiniń Bas hatshysy To Lam qol qoıǵan Qazaqstan men Vetnam arasynda strategııalyq áriptestik ornatý týraly birlesken málimdemeni júzege asyrý boıynsha aldaǵy jumystarǵa nazar aýdaryldy. Saýda, aýyl sharýashylyǵy, kólik jáne logıstıka, azamattyq avıatsııa, týrızm salasyndaǵy ózara is-qımyldy keńeıtý, tsıfrlyq qyzmetter engizý jáne JI ıntegratsııasy boıynsha ozyq tájirıbe almasý perspektıvalary qaraldy.
Joǵary deńgeıde qol jetkizilgen taýar aınalymyn $2 mlrd-qa deıin arttyrý jónindegi ýaǵdalastyqtar sheńberinde Qazaqstannyń 35 taýar atalymy boıynsha vetnam naryǵyna jetkizý kólemin ulǵaıtýǵa daıyndyǵy atap ótildi. Olardyń ishinde munaı-hımııa, metallýrgııa, hımııa, mashına jasaý, tamaq ónerkásibi jáne basqa da ónimder bar.
Aýyl sharýashylyǵy salasynda oń serpin belgilendi. Ótken jyldyń qorytyndysyna sáıkes, Qazaqstan men Vetnamnyń AÓK ónimderi boıynsha saýda kólemi 3,5%-ǵa, qazaqstandyq aýyl sharýashylyǵy ónimderin jetkizý 15 esege ósti. Sondaı-aq aýyl sharýashylyǵynyń ónimdiligin arttyrýǵa baǵyttalǵan zamanaýı agrotehnologııalardy engizý úshin ǵylym salasynda tájirıbe almasý keleshegi zor baǵyt sanalady.
Kólik-logıstıka salasynda Transkaspıı halyqaralyq kólik baǵytyn damytý aıasyndaǵy ózara is-qımylǵa nazar aýdaryldy. Orta dáliz Vetnamnan júkterdi jetkizý merzimin qysqartýǵa múmkindik beredi, bul ózara saýdany sapaly jańa deńgeıge shyǵarýdy qamtamasyz etedi.
Kelissózder qorytyndysy boıynsha taraptar Qazaqstan men Vetnam arasyndaǵy ekijaqty saýda-ekonomıkalyq yntymaqtastyqty nyǵaıtý úshin barlyq kúsh-jigerdi jumsaýǵa nıetti ekenderin bildirdi.
Osyǵan deıin Qazaqstandaǵy Vetnam qyzyǵyp otyrǵan salalar týraly jazdyq.