Eýropalyq Odaqpen ekijaqty taýar aınalymy 45 mıllıard dollardan asty - Prezıdent
ASTANA. KAZINFORM - Brıýsselde Eýropalyq Odaqqa múshe memleketter iskerlik orta ókilderiniń qatysýymen «Qazaqstan – EO» dóńgelek ústeli uıymdastyryldy, dep habarlaıdy Aqordanyń baspasóz qyzmeti.
Qasym-Jomart Toqaev jıynǵa qatysýshylar aldynda sóz sóılep, Qazaqstan men EO arasyndaǵy qarym-qatynas shynaıy strategııalyq sıpatqa ıe bolǵanyn atap ótti.
– Búginde Eýropalyq Odaq elimizdiń eń iri saýda jáne ınvestıtsııalyq seriktesi sanalady, onyń úlesine Qazaqstanǵa shetelden tikeleı tartylǵan ınvestıtsııanyń jartysyna jýyǵy tıesili. Tek ótken jyldyń ózinde ekijaqty taýar aınalymy 45 mıllıard dollardan asty. Bul jetistik halyqaralyq deńgeıde moıyndaldy. BUU Saýda jáne damý uıymynyń (ıÝNKTAD) dúnıejúzilik ınvestıtsııalar týraly sońǵy esebine sáıkes, Qazaqstan shet elden tikeleı ınvestıtsııa tartý boıynsha Ortalyq Azııada birinshi orynǵa ıe, sondaı-aq postkeńestik keńistik pen teńizge shyǵatyn joly joq damýshy elder arasynda kóshbasshylyqty saqtap keledi. Qazaqstanda 4 myńǵa jýyq eýropalyq kompanııa tabysty jumys isteıdi. Olardyń kóbi, ásirese, Airbus, Polpharma Group, Air Liquide Group, Škoda Group jáne Alstom sekildi kompanııalar ondaǵan jyldardan beri senimdi serikteske aınaldy. Sonymen birge biz eýropalyq ınvestorlardyń jańa býynyn qýana qarsy alamyz. Olardyń qatarynda Roca Group, Inditex, Maersk, Dewulf jáne Damen Shipyards Group sııaqty tanymal kompanııalar bar, – dedi Prezıdent.
Osyǵan deıin Qazaqstan men Eýropalyq Odaq qandaı qujattarǵa qol qoıǵany týraly jazdyq.
