Ótken jyly eńbek jaǵdaıyndaǵy oqys oqıǵadan 202 adam qaza bolǵan
ASTANA. KAZINFORM – Elimizde ótken jyly eńbek jaǵdaıyndaǵy oqys oqıǵalardan 202 adam qaza bolǵan. Bul týraly QR Eńbek jáne halyqty áleýmettik qorǵaý mınıstri Svetlana Jaqypova aıtty.
— 2024 jyly jazataıym oqıǵalardan 1 408 adam zardap shekti, olardyń ishinde 202 adam qaza tapty. 445 myńnan astam jumys orny áli de zııandy jáne (nemese) qaýipti retinde jikteledi, - dedi ol Úkimet otyrysynda.
Sondaı-aq vedomstvo basshysy óndiristik jaraqattardan japa shekken adamdar jaıly da málimet keltirdi.
- 15 976 azamattyń kásiptik eńbekke qabilettiliginiń joǵalǵany anyqtaldy, onyń ishinde 8 204 adam kásibı aýrýlardan jáne 7 771 adam óndiristik jaraqattardan zardap shekken, - dedi Svetlana Jaqypova.
Aıta keteıik, bıyl eńbek ınspektorlary 19,1 myńnan astam jumyskerdiń quqyǵyn qorǵady.