Ótken jyly elimizde 13 myń shaqyrymǵa jýyq jol jóndelgen

ASTANA. KAZINFORM – 2025 jyly elimiz boıynsha 13 myń shaqyrymǵa jýyq jolda qurylys jáne jóndeý jumystary júrgizilip, Qyzylorda – Jezqazǵan, Qalbataý – Maıqapshaǵaı jáne Uzynaǵash – Otar jobalary aıaqtaldy.

Bul týraly búgin Kólik mınıstrliginiń alqa otyrysynda Premer-mınıstriniń birinshi orynbasary Roman Sklıar málim etti.

Otyrysqa tóraǵalyq etken Úkimet basshysynyń orynbasary ótken jyly temirjol salasynda iri ınfraqurylymdyq jobalar júzege asyrylǵanyn atap ótti.

Atap aıtqanda, Dostyq – Moıynty ýchaskesi men Almaty stantsııasynyń aınalma temirjol jelisi iske qosyldy, 1,5 myń shaqyrymnan astam jol jańartyldy, shamamen 320 mln tonna júk tasymaldandy.

Azamattyq avıatsııa salasynda ushý qaýipsizdigi boıynsha IKAO standarttaryna sáıkestik deńgeıi 95,7 paıyzǵa jetti. Elimizdegi áýejaılar 30 mln-nan astam jolaýshyǵa qyzmet kórsetti, halyqaralyq marshrýttar jelisi keńeıtilip keledi.

Aıta keteıik, is-sharaǵa Prezıdent Ákimshiliginiń, Úkimet Apparatynyń ókilderi, vedomstvoǵa qarasty uıymdardyń basshylary jáne jergilikti atqarýshy organdardyń ókilderi qatysty.

Jıynda Kólik mınıstri men onyń orynbasarlary Memleket basshysynyń tapsyrmalarynyń oryndalýy jáne 2025 jylǵy salanyń negizgi kórsetkishteri týraly esep berip, aldaǵy kezeńge arnalǵan basym baǵyttardy aıqyndady.

Óz sózinde Premer-mınıstrdiń birinshi orynbasary alqa otyrysy elimizdegi saıası transformatsııa jáne Qazaqstan Respýblıkasynyń jańa Konstıtýtsııasyn ázirleý aıasynda ótip jatqanyn atap ótti.

-Jańa Konstıtýtsııa jobasy qoǵamnyń belsendiligi men saıası mádenıetin arttyrý sharalaryn kózdeıtin, memleketimizdiń damýynyń sapalyq jańa deńgeıin belgileıtin tujyrymdamalyq jańa qujat bolyp tabylady, – dedi ol.

Osyǵan deıin Kólik mınıstrligi temirjoldaǵy tozǵan jyljymaly quramdy tirkeýge shekteý engizýdi usynǵan bolatyn.