Ótken jyly elden qansha adam ketip, qanshasy keldi

ASTANA. KAZINFORM — 2025 jyly Qazaqstanǵa turaqty turýǵa 23 761 adam keldi, al ketkenderdiń sany 7 608 adam.

Syrtqy kóshi-qonnyń saldosy oń — 16 153 adam. Osylaısha elimizde qatarynan úshinshi jyl kóshi-qonnyń oń saldosy baıqalyp otyr.

2024 jylmen salystyrǵanda Qazaqstannan ketkender sany 40,2% azaıdy, elge kelgender sany 18,9% kemidi.

— Negizgi kóshi-qon almasýy TMD elderimen júrgen. Dostastyq elderine barlyq kelýshilerdiń 81,8% jáne ketkenderdiń 71,8% tıesili. Basqa elderdiń ishinde Qytaıdan, Mońǵolııadan jáne Germanııadan kelgenderdiń sany kóp bolsa, ketken elder arasynda azamattar Germanııa, Polsha jáne AQSh-qa kóbirek kóshken, — delingen Ulttyq statıstıka habarlamasynda.

Kelgenderdiń basym bóligi turaqty turý úshin elimizdiń óńirleri arasynda Almaty oblysyn — 5 754 adam, Almaty qalasyn — 4 068 adam jáne Mańǵystaý oblysyn — 3 562 adam tańdaǵan.

Elden ketkenderdiń kóbi Qaraǵandy oblysynan — 1 451 adam, Almaty qalasynan — 757 adam jáne Shyǵys Qazaqstan oblysynan — 685 adam kóship ketken.

Shetelden ketkender men kelgenderdiń negizgi úlesi 35-39 jas aralyǵyndaǵy azamattar. Elden ketkender jáne kelgender arasynda tehnıkalyq jáne ekonomıkalyq bilimi bar adamdar sany basym.

— 2024 jylymen salystyrǵanda el ishindegi kóshi-qon 13,6% ósti. Óńirler arasynda elimizdiń 4 aımaǵynda halyq kóshi-qonynyń oń aıyrmasy baıqalyp otyr: Astana (87 459 adam), Almaty (33 126 adam), Shymkent (15 130 adam) qalalary jáne Almaty oblysynda (12 110 adam), — delingen habarlamada.

Aıta ketelik ótken jyly syrtqy kóshi-qon saldosy oń dınamıka kórsetken edi.