Ótken jyly ekologııa talaptaryn buzǵan 152 laýazymdy tulǵa jazalanǵan
ASTANA. KAZINFORM – Elimizde jyl saıyn 4 mln tonnadan astam kommýnaldyq qaldyq jınalady. Bul týraly Májiliste atalǵan taqyrypqa arnalǵan dóńgelek ústel barysynda Ekologııa jáne tabıǵı resýrstar mınıstri Erlan Nysanbaev aıtty.
«2023 jyldyń qorytyndysynda shamamen 4,1 mln tonna kommýnaldyq qaldyq túzildi. Onyń 24 paıyzy qaıta óńdeldi. Ákimdikterdiń aqparaty boıynsha elimizdegi 207 qala men aýdannan bólek ártúrli kezeńderde qaldyqtardy bólek jınaý 130 eldi mekende engizildi. 2023 jyly respýblıkada qatty turmystyq qaldyqtar polıgondarynyń sany — 3016. Onyń ishinde ekologııalyq jáne sanıtarlyq normalarǵa sáıkes keletini — 624 ǵana», — dedi mınıstr.
Onyń dereginshe, ótken jyly ǵaryshtyq monıtorıng arqyly 5 534 ruqsat etilmegen qaldyqtardy ornalastyrý orny anyqtaldy. Ákimdikter onyń 86 paıyzyn joıdy.
«Quqyq qorǵaý organdary, ákimdikter jáne basqa da múddeli taraptarmen birlesken jumys nátıjesinde sońǵy 4 jylda ruqsat etilmegen qoqys úıindileri sanynyń azaıý baıqalady. El boıynsha polıtsııa jáne ekologııa departamentteri qyzmetkerlerinen quralǵan mobıldi top 63 myńǵa jýyq ákimshilik quqyq buzýshylyqty anyqtady. Qaldyqtardy basqarý salasyndaǵy ekologııalyq talaptardy buzǵany úshin (ekologııa departamentteri 2022 jyly 194 laýazymdy tulǵany jalpy somasy 17, 8 mln teńgege, 2023 jyly 152 laýazymdy tulǵany jalpy somasy 17, 3 mln teńgege ákimshilik jaýapkershilikke tartty», — dedi Erlan Nysanbaev.
