Ótken jyly bıýdjet qarajatyn tıimsiz paıdalanǵany úshin 158 qyzmetker jaýapkershilikke tartyldy

ASTANA. KAZINFORM – Ótken jyly bıýdjet qarajatyn tıimsiz paıdalanǵany úshin 158 qyzmetker jaýapkershilikke tartyldy. Bul týraly Májilistiń jalpy otyrysynda Úkimettiń 2023 jylǵy respýblıkalyq bıýdjettiń atqarylýy týraly esebin tanystyrǵan Qarjy mınıstri Mádı Tákıev aıtty.

«2023 jyly 59 strategııalyq baǵyt boıynsha 26 memlekettik organnyń damý josparynda 177 makroındıkatorǵa jáne 282 nysanaly ındıkatorǵa qol jetkizý kózdelgen. Osy ındıkatorlarǵa qol jetkizý týraly komıtet jáne jumys toby otyrystarynda memlekettik organdar tolyq baıandaǵan. 2023 jyly bıýdjet qarajatyn tıimsiz paıdalaný somasy 489 mlrd teńgeni qurady. Ótken jyldyń qorytyndysy boıynsha ortalyq jáne jergilikti atqarýshy organdardyń 158 qyzmetkeri tártiptik jaýapkershilikke tartyldy. Onyń 90 paıyzy – basshylyq quram», - dedi ol.

Mınıstrdiń dereginshe, 2023 jyly Ulttyq qordyń qarajatyn basqarý tıimdiligi boıynsha oń ózgerister baıqalady. Máselen, Ulttyq qordyń aktıvteri ótken jylǵa qaraǵanda 13,4 paıyzǵa ulǵaıyp, 65,7 mlrd AQSh dollaryn qurady. Kepildendirilgen transfert 4-ten 2,2 trln teńgege deıin eki esege tómendedi.

«Ulttyq qor - balalarǵa» jobasy boıynsha aǵymdaǵy jyly bir balaǵa eseptelgen soma 100,5 AQSh dollaryn qurady. Jalpy somasy 695,5 mln dollar mólsherinde esepteldi. Onyń ishinde 2024 jyly 304 815 adam 18 jasqa jetip, 30,6 mln dollar mólsherindegi qarajatty paıdalana aldy», - dedi Mádı Tákıev.