Ótken jyly el ishinde avtokólikpen 353 mln tonna júk tasymaldanǵan
ASTANA. KAZINFORM – Kólik mınıstrliginiń derekterine saı, 2025 jyldyń qorytyndysy boıynsha kólik jáne qoımalaý salasyndaǵy jalpy ónim kólemi 12,2 trln teńgeni qurady. Bıylǵy qańtar-naýryz aılarynda salanyń ósimi 12,8%-ǵa jetti.
Bul týraly Premer-mınıstr Oljas Bektenovtyń Memleket basshysynyń elimizdiń kólik-tranzıttik áleýetin damytý baǵytyndaǵy tapsyrmalaryn oryndaý boıynsha ótkizgen keńes barysynda málim boldy, dep habarlaıdy Úkimettiń baspasóz qyzmeti.
Jıynda ınfraqurylymdy jańǵyrtý, tsıfrlyq sheshimder engizý jáne salanyń el ekonomıkasyndaǵy úlesin arttyrý boıynsha qoıylǵan mindetterdiń sapasy men merziminde oryndalýyna nazar aýdaryldy.
Ótken jyly avtokólikpen el ishinde 353 mln tonna júk tasymaldandy, «Qalbataý – Maıqapshaǵaı», «Taldyqorǵan – Óskemen», «Atyraý – Astrahan» jáne «Qaraǵandy – Almaty» baǵyttary boıynsha jalpy uzyndyǵy 2 myń shaqyrym bolatyn 4 iri joba jumystary aıaqtaldy. Qazirgi ýaqytta «Aqtóbe – Qyzylorda», «Beıneý – Sekseýil», «Ortalyq – Batys», «Qaraǵandy – Jezqazǵan» jáne Saryaǵash aınalma joly baǵyttaryn qamtıtyn tranzıttik dálizderdi damytý jumystary júrgizilip jatyr. Jalpy, jol jóndeý jumystarynyń qamtý kólemi 13 myń shaqyrymǵa jetkizildi.
EAEO ishki shekaralaryndaǵy avtokólik ótkizý pýnktterin jańǵyrtý aıasynda ótken jyly 2 ýchaskede jumys aıaqtaldy. Qazirgi tańda 37 nysan qurylys jumystarymen qamtylǵan, olardy tolyq aıaqtaý 2027 jylǵa josparlanǵan.
Premer-mınıstr ótkizý pýnktterindegi jańǵyrtý jumystarynyń baıaý júrgizilip jatqanyn synǵa alyp, qarqynnyń joqtyǵyn alǵa tartty. Barlyq operatsııalyq protsesterdi jedeldetý tapsyryldy.
