Ótken jyly aýyl sharýashylyǵynyń jalpy ónim kólemi 7,7 paıyzǵa tómendegen
ASTANA. KAZINFORM — 2023 jyldyń qorytyndysynda aýyl sharýashylyǵynyń jalpy ónimi kólemi 7,7 paıyzǵa tómendegen. Bul týraly Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıteti otyrysynda senator Álı Bektaev aıtty.
«Qazaqstan úshin agroónerkásiptik keshen el ekonomıkasynyń negizgi bir bóligi dep aıtýǵa bolady. Úkimet tarapynan osy kúnge deıin aýyl sharýashylyǵy ónimderine degen ishki naryqtyń suranysyn qanaǵattandyryp, elimizdiń azyq-túlik qaýipsizdigin qamtamasyz etý jolynda birqatar jumys jasaldy. Tipti Táýelsizdik alǵaly beri agroónerkásip kesheni men aýyldyq aýmaqtardy damytýǵa baǵyttalǵan birneshe baǵdarlamalyq qujat qabyldandy. Saladaǵy túrli problemaǵa qosa, ótken jyly elimizde aýa raıy sharýalar úshin qolaısyz boldy. Sáıkesinshe, bul aýyl sharýashylyǵy daqyldarynyń ónimdiligi men sapasyna, sharýalardyń qarjylyq jaǵdaıyna áser etti», — dedi ol.
Senator dereginshe, 2023 jyldyń qorytyndysynda aýyl sharýashylyǵynyń jalpy óniminiń kólemi 7,7, onyń ishinde ósimdik sharýashylyǵy óniminiń óndirisi 14,6 paıyzǵa tómendedi.
«Dese de, 2023 jyly eksporttalǵan aýyl sharýashylyǵy ónimderiniń quny 5 mlrd AQSh dollarynan asty. Agroónerkásiptik keshen ónimi eksportynyń jalpy kólemindegi óńdelgen ónimniń úlesi 42,6 paıyz boldy. 2024 jyly bul kórsetkishti 45 paıyzǵa jetkizý josparlanyp otyr. Osylaısha, jyl saıyn óńdelgen ónim úlesin arttyryp, Prezıdenttiń 70 paıyzǵa jetkizý týraly tapsyrmasynyń oryndalýyn qamtamasyz etýimiz qajet. Óndirilgen ónimdi qaıta óńdep, olardy eksportqa shyǵarýdy ulǵaıtý arqyly ımporttalatyn taýarlardy óz ónimderimizben almastyrmaı, básekege qabiletti ekonomıka qurý múmkin emes», — dedi Álı Bektaev.
