Ótken jyly AQSh krıptovalıýtamen baılanysty alaıaqtyqtan 11 mlrd dollar joǵaltty
ASTANA. KAZINFORM - AQSh-tyń Federaldyq tergeý bıýrosy ınternettegi qylmystarǵa qatysty jyl saıynǵy esebin jarııalady. Qujatqa sáıkes, ótken jyly amerıkalyqtar krıptovalıýtamen baılanysty alaıaqtyqtan zor shyǵyn kórgen. Bul týraly Kazinform agenttiginiń Vashıngtondaǵy menshikti tilshisi habarlaıdy.
2025 jyly Internet-qylmystar boıynsha shaǵymdardy qaraý ortalyǵyna 1 008 597 ótinish túsken. Bul kórsetkish 2024 jylǵy 859 532 ótinishpen salystyrǵanda edáýir joǵary. Ótken jyly amerıkalyqtar jalpy kólemi 20,877 mlrd dollar shyǵyn týraly málimdegen, dep habarlaıdy FOX Business.
Krıptovalıýtaǵa qatysty alaıaqtyq saldarynan kelgen shyǵyn 11,366 mlrd dollardy qurap, ınternettegi barlyq qylmystardyń jartysynan astamyna teń boldy.
Sonymen qatar, ótken jyly tirkelgen shamamen 1 mıllıon shaǵymnyń 181 565-i krıptovalıýtaǵa baılanysty bolǵan.
Esepke sáıkes, 2025 jyly krıptovalıýtaǵa ınvestıtsııa salýǵa qatysty alaıaqtyq amerıkalyqtardy eń iri qarjylyq shyǵynǵa ákelgen – onyń kólemi 7,2 mlrd dollardy qurady.
Mundaı alaıaqtyq kóbine áleýmettik jeliler, mátindik habarlamalar, jarnamalar nemese tanysý platformalary arqyly bastalady. Alaıaqtar ózderin saladaǵy tájirıbeli maman retinde tanystyryp, jábirlenýshilerdi «ınvestıtsııalyq toptarǵa» tartady.
Odan keıin olardy jalǵan ınvestıtsııalyq platformalar men qosymshalarǵa baǵyttap, qoldan jasalǵan tabysty kórsetedi nemese qosymsha qarjy salýǵa ıtermeleý úshin nesıe usynady. Aqshany keri qaıtarmaq bolǵan kezde túrli salyqtar men komıssııalar talap etiledi. Sondaı-aq alaıaqtar joǵalǵan qarajatty qaıtaryp berýge ýáde etetin jalǵan shemalardy da qoldanady.
Buǵan deıin 2 jylda Qazaqstanda krıptovalıýtanyń aınalymyna baılanysty myńnan astam qylmystyq is tirkelgeni týraly jazdyq.
