Ótken jyly 15 myńnan astam azamat jaldap turǵan páterin jekeshelendirip aldy
ASTANA. KAZINFORM — Ótken jyly 15 myńnan astam azamat jaldamaly turǵyn úıdi jekeshelendirip aldy. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
- Bıyldan bastap jalǵa beriletin turǵyn úıdi satyp alý jáne ınfraqurylym tartýdy qarjylandyrý óńirler men jergilikti bıýdjetterge jetkizilgen jalpy sıpattaǵy transfertter esebinen júzege asyrylady. Sondyqtan óńir ákimdikteri osy baǵyt boıynsha jetkilikti qarjylandyrýdy pysyqtaǵany jón, - dedi ol.
Mınıstrdiń paıymynsha, turǵyn úı saıasatyn birtindep engizý azamattardyń turǵyn úı jaǵdaıyn jaqsartý úshin óte mańyzdy. Mysaly, ótken jyly mamyrda zańnamaǵa túzetýler engizilip, ákimdikterdiń turǵyn úıdi esepke alý jáne bólý fýnktsııalary «Otbasy bankke» ótti. Jalpy, jyl boıy azamattarǵa shamamen 8 myń jaldamaly turǵyn úı jáne 11 myńnan astam jeńildetilgen ıpotekalyq nesıe berildi.
- Sonymen qatar turǵyn úı týraly zańǵa túzetýler engizilip, buryn «satyp alý quqyǵy joq» jaldamaly turǵyn úıdi jeke menshikteýge ruqsat berildi. Nátıjesinde ótken jyly 15 myńnan astam azamat atalǵan quqyqty paıdalandy. Munan bólek, turǵyn úı jaldaý aqysyn sýbsıdııalaý arqyly 11 myńnan astam azamat kómek alǵan. Osy maqsatqa respýblıkalyq bıýdjetten 7,6 mlrd teńge bólindi. Bıyl jaldaý aqysyn sol kólemde sýbsıdııalaý josparlanyp otyr, - dedi Ersaıyn Naǵaspaev.
Aıta keteıik, 2025 jyly kezekte turǵan 14,5 myń adam baspanaly boldy.
