Ótken jylǵy Túrkistan oblysyndaǵy poıyz apatyna kináliler anyqtaldy

ASTANA. KAZINFORM – «Oral vagon jóndeý kásiporny» AQ-ǵa 1,4 mln teńge aıyppul túrindegi ákimshilik aıyppul salyndy.

2024 jyly «Arys-Túlkibas» keshendi qısyq ýchaskesiniń Túlkibas-Arys temir jol ýchaskesinde júk poıyzynyń 8 vagony relsten shyǵyp ketken edi.

- Túrkistan oblysy boıynsha kóliktik baqylaý ınspektory ákimshilik quqyqbuzýshylyq týraly hattamada oqıǵaǵa «Oral vagon jóndeý kásiporny» AQ  jasaǵan vagondardy depolyq jóndeý jumystarynyń sapasyz júrgizilýi sebep bolǵanyn kórsetken. Bul jyljymaly quramnyń qalpyna keltirilmeıtin kúıge keltirilýine ákelip soqqan. Inspektor sottan «Oral vagon jóndeý kásipornyn» ákimshilik jaýapkershilikke tartýdy suraǵan, - delingen Joǵarǵy sot habarlamasynda. 

Túrkistan oblysy Túlkibas aýdandyq soty «Oral vagon jóndeý kásipornyna» qatysty úsh ákimshilik quqyq buzýshylyq týraly is materıaldaryn zerdeleı kele, tergeý barysynda 8 júk vagonynyń relsten shyǵyp ketýine tehnıkalyq sebep «Oral vagon jóndeý kásiporny» platformasyn sapasyz depo jóndeýden ótkizgeni anyqtalǵanyn kórsetti. «Oral vagon jóndeý kásipornynyń» jyljymaly quramdy, sondaı-aq temir jol kóliginde qozǵalys qaýipsizdigin qamtamasyz etetin tehnıkalyq quraldardy kútip ustaý, paıdalaný jáne jóndeý boıynsha tıisti sharalardy qabyldamaǵany úshin kinási qujattarmen rastaldy.

Sot joǵaryda atalǵandardy eskere otyryp, «Oral vagon jóndeý kásiporny» AQ  ÁQBtK-niń 559-babynyń 6, 7, 8-bóliginiń 2) tarmaǵy boıynsha kináli dep tanydy.

 - «Oral vagon jóndeý kásiporny» aktsıonerlik qoǵamyna 1,4 mln teńge aıyppul túrindegi ákimshilik aıyppul salyndy, - delingen habarlamada. 

Sot sheshimderi zańdy kúshine endi.

Eske salsaq Túrkistan oblysynda júk poıyzy relsten shyǵyp ketkeni týraly jazǵan edik. Apat saldarynan 10 poıyz kesteden keshikken edi.