Ótken jylǵy qańtar-qarashadaǵy Qazaqstan men Mońǵolııa arasyndaǵy taýar aınalymy $121,5 mln-ǵa jetken
ASTANA. KAZINFORM - Bul týraly QR Premer-mınıstriniń orynbasary – ulttyq ekonomıka mınıstri Serik Jumanǵarınniń Mońǵolııa Premer-mınıstriniń orynbasary Hassýýrıın Ganhýıagpen kezdesýi barysynda aıtyldy.
Úkimettiń resmı saıtynda jarııalanǵan málimetterge qaraǵanda, kezdesý barysynda Serik Jumanǵarın suhbattasyn joǵary memlekettik laýazymǵa taǵaıyndalýymen quttyqtap, tabysty eńbek tiledi.
Ol Mońǵolııa Qazaqstannyń Azııa aımaǵyndaǵy mańyzdy seriktesi ekenin, al ekijaqty yntymaqtastyq tarıhı tereń tamyrly ózara qurmet pen senim rýhynda dáıekti túrde damyp kele jatqanyn atap ótti.
Qazaq-mońǵol áriptestiginiń negizi retinde saýda-ekonomıkalyq ózara is-qımylǵa basty nazar aýdarylady. Memleket basshylary ortamerzimdi perspektıvada ekijaqty taýar aınalymyn $500 mln-ǵa arttyrý maqsatyn qoıyp otyr. Taraptar oǵan eki el arasyndaǵy jetkizý nomenklatýrasyn keńeıtý, kooperatsııalyq jobalardy damytý, saýda, ákimshilik kedergilerdi kezeń-kezeńimen joıý esebinen qol jetkiziletinine senim bildirdi.
2025 jylǵy qańtar-qarashadaǵy qorytyndy boıynsha Qazaqstan men Mońǵolııa arasyndaǵy taýar aınalymy $121,5 mln-ǵa (+5,5%), onyń ishinde eksport $113 mln-ǵa, ımport $8,6 mln-ǵa jetti. Qazaqstan eksportynyń qurylymynda temeki ónimi, raps tuqymy, nan, un jáne kondıterlik ónim, tamaq ónimi, maıly daqyl, sondaı-aq qozǵaltqyshtar men mashına jasaý ónimi basym. Mońǵolııadan et pen et ónimi, kashemır, aıaq kıim, kilem, júnnen jasalǵan buıymdar ımporttalady.
Taýar aınalymyn odan ári arttyrý maqsatynda qazaqstandyq tarap tikeleı iskerlik baılanys ornatý, sondaı-aq Qazaqstandaǵy ındýstrııalyq jáne erkin ekonomıkalyq aımaqtar men eksporttyq áleýetti tanystyrý úshin Mońǵolııaǵa saýda mıssııasyn jiberýdi josparlap otyr.
Jıynda aýyl sharýashylyǵy salasyndaǵy joǵary yntymaqtastyqtyń áleýeti de atap ótildi. Taraptar qazaqstandyq agrarlyq ónim eksportyn arttyrý, sondaı-aq Mońǵolııa aýmaǵynda olardyń óndirisin ornatý múmkindigin, veterınarııalyq vaktsınalardy jetkizý perspektıvasyn talqylady.
Óz kezeginde Hassýýrıın Ganhýıag aımaqtaǵy áriptes turǵysynda Qazaqstannyń Mońǵolııa úshin strategııalyq mańyzyn atap kórsetip, bıyl ekijaqty yntymaqtastyqty jandandyrýǵa senim bildirdi. Ol Qazaqstannyń Mońǵolııa men Ortalyq Azııa elderi arasyndaǵy dáneker retindegi róline toqtalyp, tarıftik emes kedergilerdi anyqtaý jáne joıý boıynsha birlesken jumys tobyn qurýǵa múddeli ekenin málimdedi. Mońǵolııa tarapy standarttaý, veterınarııalyq qorǵaý jáne mal sharýashylyǵy salasyndaǵy ózara is-qımyldy tereńdetýge qyzyǵýshylyq bildirdi.
Kezdesýdi sońynda taraptar syndarly jáne ózara tıimdi yntymaqtastyqty odan ári damytýǵa nıettestik bildirdi.
Aıta keteıik, ótken jyly Qazaqstan men Mońǵolııa syrtqy ister mınıstrleriniń kezdesýi barysynda memleket basshylary qol jetkizgen ýaǵdalastyqtarǵa sáıkes, taýar aınalymyn 500 mıllıon AQSh dollaryna deıin arttyrý múmkindikterin talqylady.