Ótken jyldyń naýryzynan beri 4 575 naýqas qyzylshaǵa qarsy em qabyldady

ASTANA. KAZINFORM – Astana qalasy Qoǵamdyq densaýlyq saqtaý basqarmasynyń basshysy Gúlnaz Dosmyrzaeva 2023 jyldyń naýryzynan beri 4 575 naýqas qyzylshaǵa qarsy em qabyldaǵanyn, onyń 3 264-i bala, 1 311-i eresek adam eken aıtty.  

Basqarma basyshysynyń sózinshe, 2024 jylǵy 19 qańtardaǵy jaǵdaı boıynsha 336 naýqas statsıonarda em alyp jatyr, onyń ishinde 236-sy bala. Balalar juqpaly aýrýlar statsıonaryndaǵy oryndar 47%-ǵa toldy. 

«Infektsııalyq statsıonarlarǵa júginýshiler sany azaımaı tur. Orta eseppen táýligine 100-ge jýyq adam túsip jatyr, onyń 75-i bala. Táýligine 50-ge jýyq adam aýrýhanaǵa jatqyzylady, onyń 35-i bala. Aýrý órshigeli beri 92 bala jan saqtaý bóliminde jatyp shyqty», - dedi ol. 

Basqarma aqparatyna sáıkes, aýyryp jatqandardyń negizgi bóligin 18-30 jas aralyǵyndaǵy jastar quraıdy. Olardyń jartysy - merzimdi áskerı qyzmetshiler men orta jáne joǵary oqý oryndarynyń stýdentteri.

Gúlnaz Dosmyrzaevanyń sózinshe, qazirgi ýaqytta qalanyń barlyq medıtsınalyq uıymynda qyzylshaǵa qarsy vaktsına jetkilikti. Qoımada vaktsınanyń 55 620 dozasy bar. Barlyq emhanada balalardy qyzylshaǵa qarsy vaktsınatsııalaý jalǵasyp jatyr. 

Aıta keteıik, JRVI jáne qyzylsha aýrýlaryna medıtsınalyq kómek kórsetý úshin emhanalarda saǵat 08.00-den 20.00-ge deıin jumys kúnderi jáne demalys kúnderi súzgi-kabınetteri jumys isteıdi.