Ótken jyldy mol tabyspen aıaqtadyq – Ulttyq quryltaı

QYZYLORDA. KAZINFORM – Elimizdiń ishki jalpy ónimi 300 mıllıard dollardan asty. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

- Biz bir el, bir halyq bolyp jumyla bilgenniń arqasynda ótken jyldy mol tabyspen aıaqtadyq. Byltyr ekonomıkamyz 6,5 paıyzǵa ósti. Elimizdiń ishki jalpy ónimi 300 mıllıard dollardan asty. Al jan basyna shaqqandaǵy úlesi Táýelsizdik tarıhynda tuńǵysh ret 15 myń dollar boldy. Bul – búkil Ortalyq Azııa aımaǵy boıynsha rekordtyq kórsetkish. Ulttyq qordyń valıýtalyq aktıvteri 5 mıllıard dollarǵa ulǵaıdy. Altyn-valıýta qorymyz eń joǵary deńgeıge jetip, 65 mıllıard dollardan asty, - dedi Qasym-Jomart Toqaev.

Sonymen Prezıdent shaǵyn jáne orta bıznestiń ekonomıkadaǵy úlesi 40 paıyzǵa jaqyndaǵanyn aıtty.

- Halyq sany 20,5 mıllıonǵa jýyqtady. Azamattardyń ortasha ómir súrý uzaqtyǵy 75,4 jasqa jetti. Eń bastysy, qoǵam ózgerdi, reformalarymyz turaqty sıpatqa ıe boldy, halyqtyń sana-seziminde úlken betburys jasaldy, - dedi Memleket basshysy.