Ótken zamannyń elesi, umytý kerek — Jetisý ákimi komandalyq qyzmet týraly

ASTANA. KAZINFORM — Ortalyq kommýnıkatsııalar qyzmeti alańynda ótken baspasóz máslıhatynda Jetisý oblysynyń ákimi Beıbit Isabaevqa qyzmet aýysqanda komandasyn ózimen ala júretinderge qatysty saýal qoıyldy.

— Jetisýǵa ózimmen bir adam alyp bardym, ol meniń kómekshim, Senat depýtaty bolyp júrgende birge jumys istegenmin. Áli kúnge deıin meniń kómekshim bolyp jumys isteıdi. Basqa birde bir adam alyp barǵan joqpyn. Basshylyq quramdaǵy adamdardyń barlyǵy Jetisý oblysynyń azamattary, — dep jaýap berdi Beıbit Isabaev óńirdiń áleýmettik-ekonomıkalyq damýy týraly esep berý barysynda.

Ákimniń aıtýynsha, óńirdegi kadrdyń deni jergilikti. 

— Mysaly, orynbasarym, apparat basshysy qyzmetin Jetisý oblysynda bastaǵan, keıin mansaptary ósip Astanaǵa, Almatyǵa jumysqa ketken, biraq olardy keri shaqyryp aldym. Tipti, menen basqa Almaty oblysynda týǵan azamattar joq. Barlyǵy Jetisý oblysynda týyp ósken azamattar. Aýdan ákimderiniń bári jergilikti kadrlar. Sondyqtan, komandalyq degen ótken zamannyń elesi, ony umytý kerek. Men ondaıǵa eshqashan barmaımyn, — deıdi ol.

Aıta keteıik, Jetisý oblysynda 2,6 trln teńgege 189 ınvestıtsııalyq joba qolǵa alyndy. 

Sondaı-aq, Beıbit Isabaev aýylǵa jumys isteýge barǵan erli-zaıypty dárigerlerge 20 mln teńge járdemaqy beriletinin aıtyp otyr.