Ótken úsh aıda negizgi kapıtalǵa salynǵan ınvestıtsııalar kólemi 1 157 mlrd. teńgeni qurady
ASTANA. QazAqparat - 2016 jylǵy qańtar-naýryzda negizgi kapıtalǵa salynǵan ınvestıtsııalar kólemi 1 157 mlrd. teńgeni qurady. Bul 2015 jylǵy qańtar-naýryzǵa qaraǵanda 15,7 paıyzǵa artyq.
QR Ulttyq ekonomıka mınıstrligi Statıstıka komıtetiniń habarlaýynsha, qysqa merzimdi ekonomıkalyq ındıkator 2016 jylǵy qańtar-naýryzda 99,4 paıyzdy qurady. Aıta keterligi, qysqa merzimdi ekonomıkalyq ındıkatordy esepteý jedeldilikti qamtamasyz etý maqsatynda júzege asyrylady. Ol JІÓ-ń 67-68 paıyzyn quraıtyn aýyl sharýashylyǵy, ónerkásip, qurylys, saýda, kólik jáne baılanys sııaqty negizgi salalar boıynsha shyǵarylym ındeksteriniń ózgerýine negizdeledi.
Osyǵan oraı, 2016 jylǵy qańtar-naýryzda ónerkásip óndirisiniń kólemi qoldanystaǵy baǵalarda 4058 mlrd. teńgeni qurap, byltyrǵa qaraǵanda 0,8 paıyzǵa azaıǵan. Óńdeý ónerkásibinde óndiris kólemi 0,3 paıyzǵa artty. Ken óndirý ónerkásibinde jáne karerlerdi qazýda óndiris kólemi 1,5 paıyz, elektrmen jabdyqtaý, gaz, bý berý jáne aýa baptaýda 0,7 paıyz, sýmen jabdyqtaýda, káriz júıesi, qaldyqtardy jınaý jáne bólýdi baqylaýda 5,5 paıyz tómendegen.
«Esepti kezeńde aýyl sharýashylyǵy jalpy óniminiń kólemi 317,8 mlrd. teńgeni qurady. Al kólik salasy boıynsha naqty kólem ındeksi 104,1paıyzǵa teń boldy. Sonymen qatar, qańtar-naýryzda júk aınalymynyń kólemi 118,7 mlrd. tkm (kommertsııalyq júk tasymaldaýmen aınalysatyn jeke kásipkerlerdiń júk aınalymy kóleminiń baǵalaýy esebimen) qurap, 2015 jylǵy qańtar-naýryzben salystyrǵanda 0,3 paıyzǵa artty. Jolaýshylar aınalymynyń kólemi 1 paıyzǵa artty. Budan bólek, qańtar-naýryzda bólshek saýda kólemi 1535,2 mlrd. teńgeni nemese 2015 jyldyń tıisti kezeń deńgeıimen salystyrǵanda 96,9 paıyzdy qurady. Al kóterme saýda kólemi 3308,6 mlrd. teńgeni nemese byltyrǵy jylmen salystyrǵanda 92,6 paıyzdy qurady», - delingen baspasóz baıanynda.
