Ótken túnde elorda kóshelerinen 3377 tekshe metr qar shyǵaryldy
ASTANA. 12 qarasha. QazAqparat - Astana qalasy tazalyǵyn qys mezgilinde qamtamasyz etýmen «Astana Tazalyq» kásiporny aınalysady. Elordanyń remı saıtynyń málimetinshe, birinshi kezekte onyń mindetine qar tazalap, jınalǵan qardy arnaıy kúresinge tasyp shyǵarý, sondaı-aq, elorda kóshelerindegi joldar men trotýarlarǵa kóktaıǵaqta arnaıy daıyndalǵan qospalar tógý jatady.
«Astana Tazalyq» JShS bas dırektory Ázimbek Basqanbaevtyń aıtýynsha, ótken túnde qala kóshelerinen 3377 tekshe metr qar shyǵaryldy. Atap aıtqanda, Saryarqa aýdanynan - 978, Almaty aýdanynan - 985, Esil aýdanynan - 1414 tekshe metr qar tasyldy.
Bas dırektordyń sózine qaraǵanda, kóktaıǵaqqa qarsy qala kóshelerine 228 tekshe metr qum men tuz aralasqan qospa sebildi. Onyń 73 tekshe metri - Saryarqa aýdanyna, 101 tekshe metri - Almaty aýdanyna, al, 108 tekshe metri Esil aýdany joldaryna paıdalanyldy.
Jumys barysynda 243 arnaıy tehnıka birligi jumyldyrylǵan eken. Saryarqa aýdanyna - 74 mashına, Almaty aýdanyna - 78, Esil aýdanyna - 91 mashına jóneltildi. «Qardy qaladan tasyp shyǵarý úshin bir aýysymda qosymsha 150 - 200 KamAZ jalǵa alynady», - dedi Ázimbek Basqanbaev.
