Ótken toǵyz aıda temir jol kólikteri 100-den astam adamdy qaǵyp ketti - QR KKM
ASTANA. 16 qarasha. QazAqparat - Kólik jáne kommýnıkatsııa mınıstrligi temirjol kóliginde júrgizgen tekserýlerdiń aralyq nátıjesin shyǵardy.
Bul týraly vedomstvonyń baspasóz qyzmetinen málim etti.
2012 jyldyń 9 aıy ishinde temirjol kóligindegi qozǵalys qaýipsizdigin buzýshylyq ótken jyldyń osy merzimimen salystyrǵanda 16 %-ǵa ósti. Aǵymdaǵy jyly qyzmetteri temirjol kóligimen baılanysty 1565 zańdy jáne jeke tulǵalardy tekserý barysynda Qazaqstan Respýblıkasynyń zańdary men quqyqtyq-normatıvtik aktilerin buzýdyń 27 000 oqıǵasy tirkelgen.
Kóliktik baqylaý komıteti tóraǵasynyń orynbasary Serǵazy Omash málimdegendeı, qozǵalys qaýipsizdigin buzýdyń negizgi sebepteri: vagondardyń tesilip, júkterdiń aǵyp ketýi saldarynan vagondardy aǵytý - 94 (2011 jyly 86), jol-kólik oqıǵalary - 30 (2011 jyly 21), aýa raıynyń qolaısyzdyqtary - 22 (2011 jyly 5) jáne basqalary. Jolaýshylardy jol boıynda qaǵyp ketý oqıǵalaryn basa aıtqan jón - 101 oqıǵa (2011 jyly 81).
Temirjol kóligimen jolaýshylar tasymaldaý qyzmetinde de birqatar buzýshylyqtar bar. Aǵymdaǵy jyldyń 9 aıy ishinde 1895 buzýshylyq tirkelgen bolsa, onyń ishinde 990 bıletsiz jolaýshy men 13 tonna resimdelmegen júkti tıeý oqıǵalary bar.
Kóliktik baqylaý organdary joǵaryda atalǵan buzýshylyqtarmen qatar sharýashylyq sýbektileriniń poıyzdar qozǵalysynyń jáne manevrlik jumystardy júrgizý qaýipsizdigin buzý oqıǵalaryn jasyrǵanyn anyqtady.
Júrgizilgen tekserýler nátıjesinde 1644 akt jasalyp, anyqtalǵan buzýshylyqtardy joıý jóninde 1176 oryndaý nusqamalary berildi, 10 mln teńge kóleminde aıyppul salyndy.
Buzýshylyqtardy joıý úshin 329 lokomotıv pen 2872 vagon qoldanystan shyǵarylsa, apattyq jaǵdaıda turǵan 259 stantsııalardaǵy baǵyttamaly burmalar men kópirler jabyldy.
Temirjol kóligindegi kóliktik baqylaýdyń aımaqtyq organdaryna múddeli memlekettik organdarmen, sharýashylyq sýbektilerimen ózara is-qımyldy kúsheıtý, temirjol kóligindegi sharýashylyq sýbektilerine júrgiziletin tekserýlerdiń sapasyn arttyrý, atap aıtqanda magıstraldi ınfraqurylymdardy, ǵımarattar men jyljymaly quramdy, qurylystardy, temirjol jabdyqtaryn kútip ustaý men jóndeý jumystaryn júrgizý sapasyn baqylaý tapsyryldy.
