Ótken toǵyz aıda Astanada A gepatıtine 73 adam shaldyqty - qalanyń bas sanıtarlyq dárigeri
ASTANA. 12 qazan. QazAqparat /Gúlmıra Alıakparova/ - 2011 jyldyń toǵyz aıynda Astana qalasynda A gepatıtine shaldyǵýdyń 73 jaǵdaıy tirkeldi.
Bul týraly búgin qala ákimdiginde vırýsty gepatıttiń aldyn alý máselesine arnalǵan dóńgelek ústel otyrysynda elordanyń bas sanıtarlyq dárigeri Sarqyt Beısenova málim etti.
S.Beısenovanyń aıtýynsha, 2011 jyl Astana qalasy úshin vırýsty A gepatıt aýrýynyń tsıkldik kóterilý jyly retinde boljandy. Biraq mamandardyń boljamyna qaramastan, ýaqytynda qoldanylǵan aldyn alý jáne epıdemııaǵa qarsy sharalar vırýsty gepatıt aýrýlaryn ótken jylǵy deńgeıde ustap qalýǵa múmkindik berdi. 2011 jyldyń toǵyz aıynda Astanada A gepatıtine shaldyǵýdyń 73 jaǵdaıy tirkelip, 100 myń adamǵa shaqqanda kórsetkish 10,5-ti qurady (2010 jyly - 10,3). Sonyń ishinde 14 jasqa deıingi balalardyń úles salmaǵy - 38 paıyz (2010 jyly - 45 paıyz).
«Jas ereksheligi boıynsha, eń kóp aýyrǵandar 20-29 jas aralyǵyndaǵy azamattar (37 paıyz) men 15-19 jastaǵy jastar (15 paıyz). Balalar arasynda kóp jaǵdaı 7-14 jastaǵylar arasynda tirkeldi (33 paıyz). Kásibı quram boıynsha mektep oqýshylary - 37, stýdentter - 15 paıyzdy qurady», - dedi ol.
SEQ departamenti basshysynyń sózine qaraǵanda, 2005 jyldan bastap Astana qalasynda 2 jastaǵy balalarǵa josparly ımmýndaý ótkizile bastady. Bul A gepatıtiniń balalar kóp shoǵyrlanǵan mekemelerde tirkelmeýine jáne 7 jasqa deıingi balalar arasynda naýqastaný kórsetkishin azaıtýǵa septigin tıgizdi.
Mamandardyń pikirinshe, A gepatıtiniń negizgi berilý joldary men faktorlary áli de turmystyq-qatynastyq joldar bolyp tabylady. Atap aıtqanda, vırýs 14 paıyz jaǵdaıda naýqaspen tikeleı qatynasqa túskennen keıin, 21 paıyzynda jeke bastyń gıgıenasyn saqtamaǵannan jáne 11 paıyzynda ózge eldi mekende bolyp kelgennen keıin juqqan. Tekserý nátıjeleri, 7 paıyz jaǵdaıda vırýs sý arqyly berilgenin anyqtasa, 44 paıyzynda berilý joldary belgisiz bolyp qaldy. «Bul jaǵdaıda adam, gepatıttiń sarǵaıýsyz ótetin túrimen aýyrǵan naýqaspen qatynasta bolǵan bolýy múmkin», - deıdi S.Beısenova.
A gepatıtiniń tamaqtaný jolymen túsýine zertteý júrgizý úshin departament mamandary jyl boıy qala bazarlaryndaǵy kókónister men jemisterden synamalar alady. Bıylǵy 186 synamanyń 5-ýinde rotavırýsty antıgen anyqtalyp, kókónister men jemisterdiń lastanǵanyn dáleldedi.
Departament basshysy, gepatıtke qarsy ımmýndaý jergilikti bıýdjet esebinen tek 2 jasqa tolǵan balalarǵa ǵana júrgiziledi. Al 7-den asqan balalardy «On Clinik» jáne «Open Clinik» medıtsınalyq ortalyqtarynda aqyly negizde ege alatynyn eske saldy.
