Ótken táýlikterde el aımaqtarynda órt saldarynan úsh adam qurban boldy
ASTANA. QazAqparat - Ótken táýlikterde el aımaqtarynda órt saldarynan úsh adam qaza boldy, bireýi zardap shekti, dep habarlady QR TJM baspasóz qyzmetinen.
Aqtóbe oblysynyń Mártók aýdanynyń Jaısań aýylynda jeke turǵyn úı órtendi. Tilsiz jaýdy aýyzdyqtaýǵa QR TJM Aqtóbe oblysynyń TJD órt sóndirý qyzmetiniń 1 tehnıkasy men jeke quramnyń 3 adamy jumyldyryldy. 25 sharshy metr aýmaq otqa orandy. Oqıǵa ornynan 54 jastaǵy er adamnyń máıiti tabyldy.
Jambyl oblysynyń Talas aýdany Qarataý qalasynda «Flora» saıajaı alabyndaǵy úıde órt boldy. Órtke qarsy qyzmet ókilderi oqıǵa ornyna shaqyrylǵan joq. 4 sharshy metr jer otqa orandy. 40 jastaǵy er adamnyń máıiti tabyldy.
Jambyl oblysy Taraz qalasynyń Shóldala aýylynda «Veteran» saıajaı alabyndaǵy úıde órt shyqty. Ony aýyzdyqtaýǵa QR TJM Jambyl oblysynyń TJD órt sóndirý qyzmetiniń 3 tehnıkasy men jeke quramnyń 9 adamy jumyldyryldy. Oqıǵa ornynan 64 jastaǵy er adam denesindegi kúıikpen aýrýhanaǵa jatqyzyldy.
Pavlodar oblysynyń Qashyr aýdany Ýspenka aýylynda jekemenshik úıde órt tutandy. Tilsiz jaýdy aýyzdyqtaýǵa QR TJM Pavlodar oblysynyń TJD órt sóndirý qyzmetiniń 1 tehnıkasy men jeke quramnyń 3 adamy jumyldyryldy. Jalynǵa oranǵan aýmaq 20 sharshy metrdi qurady. Oqıǵa ornynan 63 jastaǵy er adamnyń máıiti tabyldy.
