Ótken táýlikte jol apattarynan 3 adam kóz jumyp, 13-i zardap shekti - TJM
ASTANA. Qańtardyń 19-y. QazAqparat - Ótken táýlikte respýblıka avtojoldarynda oryn alǵan jol-kólik apattarynyń saldarynan 3 adam mert bolyp,
taǵy 13-i túrli dene jaraqattaryn aldy, dep habarlady Tótenshe jaǵdaılar mınıstrliginen.
Máselen, Mańǵystaý oblysy Qaraqııa aýdanynan shyǵatyn Aqtaý-Jańaózen avtojolynyń 106-shy shaqyrymynda «Opel» jáne «VAZ» avtokólikteriniń soqtyǵysýy oryn alyp, keleńsiz jaǵdaıdyń saldarynan ekinshi kóliktiń júrgizýshisi men onyń eki jolaýshysy sol jerde qaza tapty. «Opeldi» basqarǵan 33 jastaǵy azamat pen onyń tórt jolaýshysy túrli jaraqattarmen aýrýhanaǵa jetkizildi.
Sondaı-aq osy kúni Jambyl oblysy Baızaqov aýdanyndaǵy Almaty-Tashkent avtojolynyń 497-shi shaqyrymynda «Folksvagen» jáne «Aýdı» avtokólikteriniń soqtyǵysýy boldy. Jol-kólik apatynda eki mashınanyń júrgizýshisi men eki jolaýshy zardap shekti.
Al Ońtústik Qazaqstan oblysy Saıram aýdanyna qarasty Martóbe aýylynda aýyldyń ishki jolyn «Folksvagen» jáne «Aýdı» avtokólikteri bólise almaı, tumsyq túıistirip, eki júrgizýshi men eki jolaýshy aýrýhanaǵa tústi.
