Ótken táýlikte SQO-da taǵy da eki adam sýǵa ketti
PETROPAVL. QazAqparat - Soltústik Qazaqstan oblysynda sońǵy bir táýliktiń ishinde taǵy da eki adam sýǵa ketti, dep habarlaıdy QazAqparat tilshisi.
Oblystyń Tótenshe jaǵdaılar departamentiniń málimetinshe, qaıǵyly oqıǵalardyń ekeýi de Taıynsha aýdanynda bolǵan. Jergilikti turǵyndar tańerten erte Kırovo aýylyna jaqyn mańdaǵy jasandy sý qoımasynan 48 jastaǵy er adamnyń óli denesin alyp shyqqan. Azamat balyq aýlaý kezinde sýǵa batyp ketken.
«Qaıǵyly jaǵdaıǵa sýda qaýipsizdik erejelerin saqtamaý sebep bolyp otyr. Kýágerlerdiń aıtýynsha, qaza tapqan adam mas bolǵan. Dál sol kúni Birlik aýylyna jaqyn ornalasqan Chaglınka ózeniniń tyıym salynǵan aýmaǵynda 17 jastaǵy bozbala sýǵa batyp ketti. Máıitti jaǵaǵa jedel-qutqarý jasaǵynyń qyzmetkerleri alyp shyqty», - dedi baspasóz qyzmetiniń ókili.
Bir kún buryn óńirde 20 jastaǵy jigit sýǵa túsip, qaıtys bolǵan, al dúısenbi kúni taǵy da eki er adam dál osyndaı jaǵdaıda qaza tapqan.
Soltústik Qazaqstan oblysynda shomylý maýsymy ashylǵaly beri 7 adam sýǵa ketken, onyń úsheýi - balalar.
