Ótken táýlikte peshtiń durys jumys istemeýi saldarynan elde 8 adam ystan ýlandy
NUR-SULTAN. QazAqparat - Ótken táýlikte respýblıka aýmaǵynda pesh aqaýynyń saldarynan 8 adam ystan ýlanyp, 2 adam jylytý qazandyǵynyń jarylýynan túrli jaraqat aldy, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, peshti durys paıdalanbaýdyń saldarynan taǵy 5 adamǵa ys tıgen.
Osylaısha, Almaty qalasyndaǵy Alataý aýdanynyń Shańyraq-1 shaǵynaýdanynda tabıǵı gazben janatyn peshten gaz shyǵýy saldarynan 2016, 2017, 2020 jylǵy úsh bala ıis tıip, aýrýhanaǵa jetkizildi. Balalardyń jaǵdaıy ortasha aýyr.
Shyǵys Qazaqstan oblysynda azamattardyń ıis tıip ýlanýynyń eki oqıǵasy tirkeldi. Aıagóz aýdanynyń Aıagóz qalasyndaǵy birqabatty turǵyn úıdiń páterinde kómirmen janatyn peshtiń aqaýy saldarynan 1952 jylǵy er adam men 1955 jylǵy áıel ıis tıip ýlanyp, aýyr halde aýrýhanaǵa jetkizilgen. Oqıǵaǵa pesh murjasynyń tazalanbaýy sebep boldy.
Ekinshi oqıǵa Shemonaıha aýdanynyń Shemonaıha qalasynda boldy. Birqabatty, bespáterli úıdegi №5 páterde kómirmen janatyn pesh aqaýynyń saldarynan páter ıesi, 1976 jylǵy áıel ıis tıip ýlanǵan. Ol aýrýhanaǵa aýyr halde jetkizildi. Oqıǵaǵa pesh murjasynyń (tútindik) tazalanbaýy sebep boldy.
Taǵy bir oqıǵa Aqtóbe qalasynda tirkelgen. «AZF-9» baqsha egý ujymyndaǵy saıajaıda kómirmen janatyn pesh aqaýy saldarynan 2007 jáne 2011 jyly dúnıege kelgen balalar ıis tıip ýlanǵan. Olar aýrýhanaǵa ortasha aýyr halde jetkizildi. Oqıǵa pesh murjasynyń (tútindik) tazalanbaýy sebebinen bolǵan.
Almaty oblysyna qarasty Kerbulaq aýdanynyń Saryózek kentindegi jekemenshik turǵyn úıde jylytý qazandyǵy jarylyp, úıdegi 2 sharshy metr aýmaqta kómirmen janatyn pesh pen qabyrǵa jarym-jartylaı qıraǵan. Kúıik shalyp, jaraqat alǵan úıdiń ıesi, 1963 jylǵy áıel men 1985 jylǵy er adam aýrýhanaǵa jetkizildi. Aldyn ala nusqa boıynsha, jarylysqa sebep – kómirmen janatyn peshti paıdalaný erejeleri buzý. Qazandyqtyń ishinde sý bolmaǵan.
Adamdardyń turǵyn úılerde ıis tıip qaza bolýyn boldyrmaý maqsatynda TJM peshti durys tekserip, ony paıdalaný erejelerin qatań saqtaýǵa shaqyrady.
