Ótken táýlikte órt oqıǵalarynda 5 adam mert bolyp, bir bala kómirqyshqyl gazyna ýlanyp qaldy - TJM
ASTANA. Qańtardyń 12-si. QazAqparat - Ótken dúısenbi, qańtardyń 11-i kúni respýblıka aýmaǵynda bolǵan órt oqıǵalarynyń saldarynan 5 adam mert bolyp,
kómirqyshqyl gazyna ýlanǵan 8 jastaǵy bir bala aýrýhanaǵa tústi, dep habarlaıdy QazAqparat.
TJM baspasóz qyzmetiniń habarlaýynsha, órt oqıǵalary Shyǵys Qazaqstan oblysy Glýbokovskıı aýdanyna qarasty eki kentte - Beloýsovka jáne Joǵary-Berezovkada bolǵan. Jekemenshik turǵyn úılerden shyqqan órttiń birinen - 60, ekinshisinen 57 jáne 62 jastaǵy adamdardyń deneleri tabyldy.
Sondaı-aq Pavlodar qalasy Zelenstroı kentindegi jekemenshik úıdiń aýlasyna salynǵan sharýashylyq nysannyń 35 sharshy metr aýmaǵyna taraǵan jalyndy aýyzdyqtaý barysynda, tulǵalary anyqtalmaǵan eki er adamnyń máıitteri tabylǵan. Tilsiz jaý Pavlodar oblysy boıynsha TJD órtke qarsy qyzmettiń kúshimen 4 jarym saǵattan keıin sóndirildi.
Osy qaladaǵy jekemenshik turǵyn úılerdiń taǵy birinde, 50 sharshy metr aýmaqta bolǵan órttiń saldarynan ys tıip ýlanǵan 2002 jyly týǵan bala aýrýhanaǵa jetkizildi.
