Ótken táýlikte Qazaqstanda 134 myń adam vaktsına aldy
NUR-SULTAN. QazAqparat – Ótken táýlikte elimiz boıynsha vaktsınanyń birinshi komponentin - 88 myń, ekinshi komponentin 46 myńnan astam adam alǵan, dep habarlaıdy QazAqparat.
Ortalyq kommýnıkatsııalar qyzmetinde ótip jatqan brıfıngide Qoǵamdyq densaýlyq saqtaý ulttyq ortalyǵynyń basqarma tóraǵasynyń orynbasary Aınagúl Qýatbaeva osyndaı málimet keltirdi.
«Búginde qazaqstandyqtar arasynda vaktsınatsııaǵa degen umtylys pen belsendilik artyp otyr. Sońǵy táýlikte birinshi komponentpen 88 myńnan astam adam ekpemen qamtylsa, ekinshi komponentti 46 myńnan astam adam saldyrǵan.
Sońǵy málimetter boıynsha, birinshi komponentpen qamtamasyz etilgen halyq sany 3 335 172 bolsa, ekinshi dozamen 2 mln 596 adam egildi», - dedi ortalyq dırektorynyń orynbasary.
Atalǵan sharada Aınagúl Qýatbaeva koronavırýspen aýyrǵandarǵa vaktsına salýǵa bolatyn merzim eki ese, ıaǵnı 6 aıdan 3 aıǵa deıin qysqartylǵanyn aıtqan bolatyn.
